Aizawl Western Side Bypass Road-a Quarry neite hnenah ṭanpuina pek remti

Chief minister Lalduhoma kaihhruaiin nimin khan CMO conference hall-ah sorkar hotute'n sorkar hmalakna lian zualtea hnathawh en zuitu Mizoram Pro-Active Governance and Timely Implementing (Mi-PRAGATI) hmalakna thlirho a ni. Aizawl Western Side Bypass Road-in a paltlang quarry neitu mi 10 hnenah ṭanpuina (assistance) Rs 91,91,229 pek an remti.

Ṭhutkhawma tarlan danin, Aizawl Western Side Bypass Road chu hmun ṭhenkhatah a kalna tur tihdanglam deuh rawt a ni a, Ministry phalna nghah mek a ni. Hna thawh theihna hmunah thawh reng a ni a, 33.61% vel thawh zawh a ni tawh.

Kawngin a paltlanga quarry neitute'n zangnadawmna an phût chungchangah, CM hoa ṭhukhawm chuan quarry neitu mi 10 hnenah ṭanpuina Rs 91,91,229 pek an remti. Zangnadawmna dang la tihfel lohte chu October 2026 chhunga pek theih beisei a ni.

Aizawl Western Bypass Road hi km 45-a thui niin, lei lian (major bridge) pahnih leh lei tenau (minor bridges) pariat bakah, culvert 237 awm tura ngaih a ni a; cement hmanga siam tui luankawr (PCC side drain) km 30-a thui a awm bawk ang.

Ṭhutkhawmah hian PWD minister Vanlalhlana, Environment, Forest and Climate Change minister Lalthansanga, Mizoram sorkar adviser Dr Renu Sharma, GAD secretary Sudhir Kumar leh member dangte an tel.