Girl Child Day pualin hun hmang

Women & Child Development hnuaia Kolasib District Hub for Empowerment of Women (DHEW) chuan nimin khan Kolasiba IPR Conference Hall-ah International Day of Girl Child pualin hun an hmang a, bialtu MLA Lalfamkima, Assembly deputy speaker-in a hmanpui. Thupui chu 'End child marriage and invest in girls rights' tih a ni.

Inkhawm hi WCD district programme officer Lalnunpari Hmar-in a kaihhruai a; Kolasib district-a hmeichhe naupang hlawhtlingte (women achiever) pathum - K Laldingpuii (9) d/o K Lalrempuia, Diakkawn (karate), Paisely Lalremtluangi (7) d/o Joseph Zodinthara, Ṭumpui (teakwondo) leh Esther Lalchhanchhuahi (17) d/o Lalmuanpuia, Diakkawn (teakwondo) te hnenah lawmpuina thilpek hlan a ni.

Khuallian Lalfamkima chuan, sorkarin hmeichhe naupangte humhalhna dan a zamte zah a, mi tinin an ngaih pawimawh a ṭul thu a sawi a, "Hmeichhe naupangte chanvo humhalh a, an tuina zawng leh an thiamna te thlir thiampui a pawimawh," a ti.

Deputy Speaker chuan, hmânlai Mizo nunphungah hmeichhe naupangte chu inchhungkhur chêt velah mipa naupangte aiin an ṭangkai zawk tih sawiin, "Nu leh pa ṭanpui hmasatu an nih ṭhin avangin an nihna tur thleng pha lo a, zirnaah te, infiamnaah te an theihna leh an chanvo hupbeh an ni fo," a ti a; tunah chuan khawvel hmun ṭhenkhata hmeichhe naupangte enkawl dan aiin Mizorama hmeichhe naupangte enkawl danin hma a sawn tawh zawk thu a sawi.

International Day of Girl Child hmannaah hian Kolasib khawpuia anganwadi centre-a worker leh helper te, One Stop Centre, Shakti Sadan leh DHEW-a thawkte leh naupangte an tel a ni.