Report dik lo petu man a ni

Mizoram Police chuan thuchhuah siamin, inrûkbo chungchangah report dik lo an dawn thu an tarlang a, "Report thehluttu Rita Zochhuanawmi (22) d/o Lallungkhama, Sakawrdai chu a ni a, thubuai siamsak a ni," an ti.

Mizoram Police tarlan danin, December 30, 2018 zan dar 6 vel khan Rita Zochhuanawmi hian Aizawl Police Station-ah mihring inrûkbona a awm thu a thlen a ni. Rita Zochhuanawmi sawi danin, December 30 tlai 4:30 velah a ṭhianpa Andrew Lalmuanawma Singson nen Chaltlang aṭanga Chanmari lama kea an kal thlâk laiin an bulah Bolero pakhat, Chaltlang lam aṭanga tlan thla chu a ding a, a chhung aṭangin hmai tuam mi pathum an chhuak a, a ṭhianpa chu motor-ah pawt lutin, an tlanbopui nghal a ni.

Rita Zochhuanawmi thu thlen chu police-te'n an chhui zui nghal a, finfiahna awm thei chi hrang hrang la khawmin, Adrew Lalmuanawma Singson rubotute an zawng nghal a ni. Finfiahna hrang hrang lak khawmte leh Rita Zochhuanawmi thu sawite khaikhin a nih hnuah, Rita Zochhuanawmi chuan thu a phuahchawp a nih an ringhlel a; a hnuah Rita Zochhuanawmi chuan thil thleng anga a sawi chu a phuahchawp a ni tih hriat chhuah a ni.