Doctor-te'n badge dum bel dawn

Indian Medical Association (IMA) chuan vawiin hian India ram pum huapin Protest Day an hmang dawn a, IMA Mizoram State Branch pawhin an zawm ve dawn a, Mizorama damdawi-in zawng zawngah doctor-te'n badge dum an bel dawn. IMA chuan Protest Day an hman turah hian mipui hriatthiamna leh puihna an ngen a ni.

IMA Mizoram State Branch tarlan danin, IMA-in Protest Day an hman chhan turte chu - National Medical Council (NMC) Bill, 2017, Indian Medical Council (IMC) (Amendments) Bill, 2018 leh Consumer Protection Bill, 2018 an duh loh vangte a ni.

IMA chuan, a chunga bill tarlan pathumte chu damlo leh mi harsa zawkte tan sum tam tak sên belhna a ni dawn tih sawiin, "Medical doctor zir turte leh zir mekte tan harsatna nasa tak a thlen dawn avang te, doctor-te'n damlo kan enkawl kawngah harsatna a thlen tur tam tak avangtein India rama doctor zawng zawngin he dan thar hi kan duh lo a ni," an ti.

Bill pathumte chu pass-a hman a nih chuan, doctor leh an damlo enkawlte inkara inpawhna leh inhriatthiamna thlenga a tihbuai dawn thu te, doctor-te chu ho tê têah pawh hrema tàntir theih tura a hnuaichhiah an nih dawn thute an tarlang bawk.