Tlawng lei zawh chimtu driver man a ni

Thenzawl leh Buarpui inkara Tlawng lei chu December 22, 2018 chhunah truck pahnihin an zawh laiin a chim. Lei zawh chimtu truck pakhat zawk khalhtu chu thubuai siamsak tawh.

Thu dawn danin, Tlawng lei chim ta hi Thenzawl aṭanga km. 21 vela hlaa awm, thir lei (bailey bridge) a ni a, ft. 200-a sei niin, BRO-in kum 1988-a an dawh a ni. A tirah chuan metric ton 20 phur thei tura dawh a ni a, mahse, a hlui tawh vangin metric ton 16 aia rit zawh phal loh mek a ni.

Metric ton 16 aia rit zawh phal loh a nih mek laiin, Serchhip-Thenzawl-Buarpui kawng siamtu Tantia Constructions company truck pahnihin a rualin December 22 chhun dar 12:15 khan an zawh a, a chim phah ta a ni. Truck pakhat chu a thil phurh nan metric ton 25 vela rita chhût a ni a, pahnih chu metric ton 50 vel ni tura ngaih a ni.

Lei chim chungchangah hian Thenzawl Police Station-ah FIR thehluh a ni a; FIR bawhzuiin police-te chuan lei zawhtu truck pahnih zinga a hnung zawka tlan truck driver chu an man a ni.

Lei chim hi December 23, 2018 khan PWD chief engineer (Highways) K Lalsawmvela'n a hmunah a tlawh a, Tantia Constructions hotute kawmin, lei thar dawh hna thawh mek a enfiah nghal a ni.

Tlawng lei a chim avang hian motor hmanga lui kal kai nan Tantia Constructions chuan lei chim ta thlangah hume pipe hmangin lei an siam nghal bawk.