CM Trophy hnam làm intihsiakah Chanmari West YMA an thiam ber

Art & Culture department leh Central YMA ten 'Chief Minister's Running Trophy in Cultural Dance Competition' vawi 14-na an buatsaih chu nimin khan Mizo High Sikul Field-ah zawh a ni a; a pumpuiah Chanmari West Branch YMA pakhatna an ni.

CM Running Trophy in Cultural Dance Competition hi kum 1991 khan kum khat danah neih ṭhin a ni a, kum 2016 aṭang khan harsatna hrang hrang vangin kum sarih chhung chawlhsan a ni. Kum 2024 aṭangin chhunzawm leh a ni a, kumina intihsiakah hian cheraw leh chai hmangin intihsiak niin, YMA branch 34 an tel.

Intihsiak khàrna inkhawmah Chief Minister chuan, ṭhangtharte hnenah Mizo hnam nunphungte hlan chhawn zel a ṭul thu a sawi a, "Kan hnam zai, tlar thum zai te, chài hla leh lâm tea biak-ina Pathian fakte hi a hun tawhin ka hria. Hnam dang tih dan entawna anmahni ang nih châk ni âwm taka an hnamzia lo kalpui ve zel hi kan tih tur niin ka hre lo. An hlate kan letling a, kan sa uar viau a, kan iráwm chhuak hla ngei hi i uar zawk ang u. Culture min petu Pathian hi kan culture angin bia ila, fak ila a ṭha berin ka hria," a ti.

Intihsiak khàrna inkhawm hi Art & Culture director Carol VLMS Dawngkimi'n a kaihruai a, Central YMA president R Lalngheta pawhin thu a sawi a ni.

LAWMMAN DAWNGTUTE

CHERAW

1-na Chanmari West Branch

2-na Bethlehem Vengthlang Branch

3-na Armed Veng Branch

CHÀI

1-na Pàwlráng Branch

2-na Chanmari West Branch

3-na Bethlehem Vengthlang Branch

OVERALL

1-na Chanmari West Branch

2-na Pàwlráng Branch

Member tel ṭhahnem ber : Lungdai Branch (member 38)