Neuhof School Band champion lâwm

Yamaha Teens Rock 2026-a champion Neuhof School, Chanmari, Aizawl chuan nimin khan Dawrpui Multipurpose Hall-ah champion an lawm a, bialtu MLA K Sapdanga, minister-in a hmanpui.

Teens Rock 2026-a tel tur hian India ram hmun hrang hrang aṭangin inziak lut 680 chuang an awm a, Neuhof School Band hi Northeast Zone-ah pakhatna an ni. Grand Finale-a tel turin paltlang tur online leh offline audition eng emaw zat a awm a; October 4, 2026 khan Bengaluru-ah Grand Finale neih niin, pakhatna an ni zui a ni.

K Sapdanga chuan, Neuhof School hlawhtlinna chu Aizawl North-III mipui mai bakah, Mizoram pum tan chhuanawm tak a nih thu a sawi a, "Hlawhtlinna kan lawm a ni a, history kan lawm a ni. Kan naupangte ngei a ṭum khatna atan National Champions of Yamaha Teens Rock 2026 an champion a, a ropui tak zet," a ti.

Neuhof School Band chu India rama band ṭha tak tak nen an inel thu sawiin Minister chuan, "He hlawhtlinna hi music chauh a ni lo, discipline ṭha, thawhhona ṭha, inpekna leh tumruhna a ni," a ti a, Mizoram, rimawi ngainatna hmun tia sawi ṭhin chu fiahin a awm thu a sawi.

K Sapdanga chuan, Band member-te'n Mizo mipui an chawimawi thu sawiin, "In thawhrimna, ngawrh taka in practice-nain rah ṭha a chhuah. Band enkawltute leh zirtirtute chungah ka lawm tak zet. Neuhof School-in zirna ṭha tak leh co-curricular ṭha takin in kalpui tih a lang chhuak a ni," a ti.

Champion lawmnaah hian Neuhof School principal Andrew Lalremkima pawhin thu a sawi a; band member-te chawimawina thilpek hlan a ni.