KHAWTHLIR

Thisen pe

Institute of Advance Studies and Education (IASE) NSS leh Red Ribbon Club chuan October 29, Ningani khan an hmunah thisen pek huaihawtin, ZMCH tan thisen unit 77 an pe a, petute mipa 43 leh hmeichhia 34 an ni. DIET, Siahaa zirlai Pre Service Trainees Union pawhin nimin khan DIET Multipurpuse Hall-ah Blood Awareness Campaign cum Blood Donation Camp an huaihawt a, Siaha District Hospital tan thisen unit 20 an pe a, petute mipa 14 leh hmeichhia paruk an ni.

Leiṭha an man

Khawzawl police-te chuan nimin zing khan truck MZ-01 AF-2556 aṭangin Tuisenphai check gate-ah leiṭha (urea/fertiziler) ip 550 an man a, Rs 7,15,000 hùa chhût a ni. Leiṭha neitu leh a phurtu Lalremruata (46), Tuikual South chuan Myanmar-ah man to zawka hralh a tum thu police-te a hrilh.

Hnathawh endik

Mizoram State Project Monitoring Committee (MSPMC) chuan nimin khan Champhai Vengthlanga Working Women Hostel leh Champhai Vengsanga District Court Building sak hna thawk mek tlawhin, hna thawh dan leh hmasawnnate an enfiah. Contractor Beriwal Construction, Guwahati chu a hun taka hna an thawh zawh theih nan ṭan la turin an chah a ni.

Hmalakna sawiho

Lok Sabha MP Richard Vanlalhmangaiha hoin nimin khan Serchhip District Development Coordination and Monitoring Committee (DISHA) an ṭhu. Richard Vanlalhmangaiha chuan, sorkar laipui scheme-te tihhlawhtlin a nih theih nan neitu thinlung pua ṭhahnemngai taka thawk zel turin line department-te a chah. MP hian Serchhip district-a centrally sponsored scheme hnuaia hmalakna hrang hrang a tlawh bawk.

BBBP ruahmanna

Aizawl District Imple-menting Committee on Mission Shakti chu nimin khan additional DC Zoramsiama Hmar kaihhruaiin an ṭhu a; line department-te nen Beti Bachao Beti Padhao (BBBP) hnuaia hmalaknaa thawhhona turte relin, ruahmannate an pawm. Department-te thawhhona kaltlang-in Aizawl district-a hmeichhe naupangte chawi kân leh tihhma-sawn kawngah theihtawp chhuah tum a ni.