Ruihhlo do beihpui thlakna tur Operation Jericho-2 hawn a ni

Mizoram sorkarin hunpui lo thleng tur thlira a ruahman, ruihhlo tawlhrukna leh ruihhlo hmansualna dona atana November 1 aṭanga kal-pui ṭan tur Operation Jericho-2 chu nimin khan Police Headqquarters multipurpose hall-ah DGP Sharad Agarwal-a'n a hawng.

Mizoram Police tarlan danin, Operation Jericho thawh hnihna hi ruihlo donaa dan kengkawhtute hmalakna tichak zual tur te, ruihlo tawlhrukna dang chat tur leh, state chhunga ruihhlo hmanga sumdawnnate ṭhiat tura ruahman a ni.

November 1, 2026 aṭangin 1st MAP, 3rd MAP, 1st IR leh 5th IR sipaite tír chhuakin Operation Jericho-2 kalpui a ni dawn a; district SP-te kaihhruaina hnuaiah tlawmngai pawlte leh a kaihhnawih pawl dangte nen thawkhoin district hrang hrangah kalpui a ni ang.

Ramri hrúl district-te chu ruihhlo lak luh, tawlhruk leh ram chhung hmun danga thawn kual tur veng turin an pawimawh avangin ngaih pawimawh bik an ni dawn. Intelligence hman ṭangkai te, agency hrang hrang thawhhona tihchak te, ramri venhimna leh mipui nena ruihhlo donaa thawhhona tha lehzual neih te chu beihpui hlawhtlinna atana lungphum pawimawh leh ngaih pawimawh a nih dawn thu Police chuan an tarlang.

Operation Jericho hi September 1, 2025 khan Mizoram Police, Excise & Narcotics department leh Central YMA te thawhhonain ṭan a ni a; a tum ber chu - ruihhlo tawlhrutute leh ruihhlo hmanga sumdawngte chhui chhuah leh man chhuah kawnga ngawrh lehzuala beih a ni.

Beihpui thlakna hnuaiah hian Champhai district-a Myanmar ramri hrûl khaw 22-ah police dah a ni a; police-te chuan district police, tualchhung tlawmngai pawl, Village Defence Party (VDP) leh YMA branch-te thawhpuiin, ruihhlo tawlhruk titawp turin an thawk. Khaw 22-a police dahte chu tunah chuan lak chhuah an ni tawh.

Operation Jericho hmasa chhungin, March 31, 2026 thleng khan ruihlo cheng vbc 391.95 hû man a ni a; mi 298 man niin, thubuai case 203 ziah luh a ni. October 26, 2026 thleng khan mi 663 man niin, thubuai 447 ziah luh a ni a, ruihhlo man zawng zawng chu cheng vbc 843.47 hù a tling.

Mizoram Police chuan, hlawhtling taka beihpui thlak a nih theih nan pawl hrang hrangte thawhpuiah an sawm tih an tarlang a, "Ruihlo tawlhruk, zawrh leh a kaihhnawih thil eng pawh thuneitute hnena hriattir thuai ṭhin turin mipui kan ngen a, theihtawpa police-te min thawhpui turin kan inngen a ni," an ti.