Inter-State Border Festival chhunzawm

Mizoram leh Assam ramri depa awm Kolasib district-a leh Cachar district mite inkarah inkungkaihna leh inṭhian ṭhatna a awm theihna tura Vairengte Joint YMA Field-a buatsaih 'Inter-State Border Festival' chu nimin khan chhunzawma zawh a ni a; nimina khan Assembly deputy speaker Lalfamkima, Kolasib bialtu MLA-in a hmanpui.

State pahniha mipuite hnam nunphung inhriat chiansak tawnna a awm theihna tura buatsaih Inter-State Border Festival-ah hian state/district pahnih aṭangin hnam lâm leh zai te entir a nih bakah, infiamna chi hrang hrang buatsaih a ni a; Cachar district aṭangin Silchar Mizoram House deputy resident commissioner Lalhmingliana hoin Silchar Branch YMA aiawhte an tel.

Khuallian Lalfamkima chuan, kût chu state inhnaih tak pahnihte tan inzawmna ṭha zawk thlentu a nih a beisei thu a sawi a, "Administration thilah ramri (border) hranin awm mah ila, kan thawhhona leh ralmuang taka kan awmhona hi a chhe tur a ni lo. Kan ṭhat tlan nan kan thawhho a ngai a, nun dan, chîn dan leh sakhuate a hran avangin kan inkar a chhe tur a ni lo. Kan thawhho chuan hmasawnna kan hmu zel dawn a, culture, sport leh thil dangah inzawmna ṭha zawk neih a ṭul," a ti.

District administration, police leh department hrang hrangte an pawimawh thu sawiin Lalfamkima chuan, "Thu dik lo thehdarhin kan inkar a tihchhiat loh nan kan fimkhur a ngai a, mi tlemtê duhâmna avangin inlaichinna ṭha kan tihchhiat a thiang lo," a ti a; insumdawn tawnna, kut hnathawktute leh ṭhalaite inkarah thawhhona ṭha zawk neih a ṭul thu a sawi.

Dholai (Assam) bialtu MLA Amio Kanti Das pawhin thu sawiin, state pahnihte inunauna atana kût buatsaih a pawimawh thu a sawi a, "Hmarchhak hmasawnna atan pawh thil ṭangkai tak a ni a, kût hian thawhhona ṭha zawk leh boruak muanawm a thlen zel ka beisei," a ti.

Kolasib bawrhsap H Dolianbuaia, Cachar bawrhsap Rahul Kumar Gupta, Kolasib SP Lalrinpuia Varte, Kolasib DRDO project director Lalmuanpuia leh Vairengte SDO (Civil) Dr Samuel Lalmalsawma Sailo-te pawhin thu an sawi bawk.