Pawikhawihna tuartu mi 27-te zangnadawm- na sum hlan a ni

Mizoram State Legal Services Authority (MSLSA) leh Lunglei District Legal Services Authority (DLSA) chuan nimin khan Lungleia Hotel Silver Mount-ah 'The Mizoram Victims of Crime Compensation Scheme, 2011' zirhona leh pawi khawina tuartute hnena zangnadawmna semna hun an buatsaih a; mi 27 hnenah zangnadawmna pek a ni.

Mizoram Victims of Crime Compensation Scheme, 2011 hi kum 2012 khan hman ṭan a ni a; kum 2012 aṭanga 2025 thlengin pawi khawihna tuartute hnenah zangnadawmna cheng Rs 16,68,52,000 pek a ni tawh. Lunglei district bikah kum 2012-2025 chhungin zangnadawmna Rs 2,43,87,500 sem a ni tawh a; nimin khan mi 27 hnenah cheng nuai 118.75 sem a ni.

Inkhawm hmanpuitu Gauhati High Court judge Justice Nelson Sailo, MSLSA executive chairman chuan, pawi khawihna tuartute a tawrhpui thu sawiin, "Zangnadawmna hi taksa, rilru leh sum leh paia an tawrhna chhâwk vek theihna leh an mamawh zawng zawng phuhrûkna tur ni lo mah se, sorkarin an vanduaina tawh a hriatpui a, a tawrhpui tih lantirna leh a tuartute’n nunphung pangngai tak an neih theih nana inenkawlna tura duan a ni," a ti.

Lunglei bawrhsap Navneet Mann chuan, pawi khawihna a thlenin pawi khawitu man chhuah leh an chungthu relnaah chak taka hmalak ṭhin a nih laiin, a tuartute tawrhna hmuh hmaih a ni fo tih sawiin, Mizoram sorkarin pawikhawihna tuartute tan zangnadawmna ṭha tak a ruahman chu lawmawm a tih thu

a sawi.