PM-KISAN ṭanpuina sem a ni

Prime minister Narendra Modi chuan nimin khan Gujarat aṭangin PM-KISAN hnuaia kut hnathawktute ṭanpuina a sem. Ṭanpuina hi India rama loneitu chhungkaw vbc 9.34 hnenah cheng vbc 18,690 sem a ni a, Mizorama chhungkaw 1,27,064 pawhin ṭanpuina cheng vbc 25.59 an dawng.

PM-KISAN hnuaia ṭanpuina sem inkhawm hi live-a pek chhuah a ni a, India ram hmun hrang hrang aṭangin kut hnathawktute'n an thlir. Agriculture & Farmers Welfare minister PC Vanlalruata hoin sorkar hotute leh kut hnathawktute'n Agriculture directorate aṭangin an chhim a, district hrang hrangah Agriculture department hotute leh kut hnathawktute'n an chhim bawk.

Kumin 2026-ah PM-KISAN ṭanpuina ṭum hnih sem a ni tawh a, tun hi a ṭum thumna a ni. PM hian India ram pumah loneitu chhungkua vbc 9.34 tan direct benefit transfer (bank transfer) hmangin cheng vbc 18,690 a sem a; Mizoram aṭangin thlai leh ranvulha eizawng chhungkaw 1,27,064-te'n Rs 25,59,62,000 an dawng a ni.

PM-KISAN hi kum 2019 khan ṭan a ni a, thlai leh ranvulhaa eizawngte hnenah kum tin Rs 6,000 pek ṭhin a ni. Kum 2019 aṭangin Mizorama kut hnathawktute hnena PM-KISAN ṭanpuina pek tawh zawng zawng chu cheng vbc 551.010 a tling.