Churachanpur-ah Mizo Integration Cultural Festival hmasa ber buatsaih

Mizo Integration Council (MIC) chuan October 29-30, 2026 khan Saikot khelmual, Churachanpur, Manipur-ah 1st Mizo Integration Cultural Festival an huaihawt a, nimin khan Art & Culture minister C Lalsawivunga khuallian niin, adviser to chief minister Lalmuanpuia Punte, MLA khualzahawm a ni.

Art & Culture Minister chuan, culture chu hnam inpumkhatna lungphûm a nih thu sawiin, "Kan nunphung hian kan hnam nihna a tichiang a, min thlahtute leh kan thlahte thlenga min thlun zawmtu a ni. Pi leh pute aṭanga kan zai leh lâm, kut themthiamnate inhlan chhâwng zelin, hmasawnna kawng zawh chunga kan ro hlute vawn nun hi kan tihmâkmawh a ni a, changkannain kan culture a chîmral tur a ni lo," a ti.

C Lalsawivunga chuan, "Mizo culture hi lehkhabuah emaw, museum leh archive-ah chauh kan dah khawm chuan hnam boral kan ni mai dawn tihna a ni a, roh leh hlut chungin hnam kan inpumkhat deuh deuh a pawimawh," a ti a; Mizote chu hnam pêng hrang hrang kal khawm, chanchin leh nunphung dang deuh neite ni mah se, chungte chu hnam ropuizia tilangtu a nih thu a sawi.

MLA Lalmuanpuia Punte pawhin thu sawiin, Mizo, Chin leh Kuki te chu an hrang lo tih sawiin, "Unau kan ni kan ti reng chungin Mizo ni lo karah buaina a awm ṭhin a, a pawi ṭhin. Hmar ka nihna hian Mizo ka nihna min dâl ngai lo a, Mizorama Paite zawng zawngin Mizo an inti vek a, buaina an nei lo," a ti.

Mizoah buaina tur a awm lo tih sawiin Lalmuanpuia Punte chuan, "Chi bilah kan buai ṭhin. Chi bil leh pêng hrang hranga kan buai chhung chuan harsatna kan tâwk reng ang. Mizo kan nihna hian min huap vek a, chu chu he hnam ropuina tur a ni," a ti a; Cultural Festival an hman chu buatsaih a nih chhan ang ngeiin hlawhtling se a duh thu a sawi.

Mizo Integration Cultural Festival thupui chu 'Integration through culture' tih a ni a, Churachanpur bialtu Manipur MLA LM Khaute chu chief host a ni. Hnam lâm leh zai te entir a ni a; Central YMA leh MZP aiawhte'n thu an sawi bawk. Nizan khan Musical Night neih a ni a, Mizoram aṭangin zaithiam eng emaw zat an tel a ni.