KHAWTHLIR

Thisen pe

October 31, Inrinni khan kohhran ṭhalai pawl palite'n thisen unit 178 an pe. KṬP, Republic Veng chuan ZMCH tan thisen unit 59 an pe a, petute mipa 42 leh hmeichhia 17 an ni a; KṬP, Chanmari Branch pawhin Synod Hospital tan thisen unit 32 pein, petute mipa 30 leh hmeichhia pahnih an ni. Inrinni vêk khan ṬKP, Aizawl City Church chuan Civil Hospital, Aizawl tan thisen unit 47 an pe a, petute mipa 37 leh hmeichhia 10 an ni a; ṬKP, Buarpui North Bial member mipa 33 leh hmeichhia pasarih ten Civil Hospital, Lunglei tan thisen unit 40 an pe bawk.

Ekta Diwas hmang

October 31, Inrinni khan Mizoram hmun hrang hrangah Rashtriya Ekta Diwas (National Unity Day) hman a ni a, Aizawlah chuan Secretariat tualah chief secretary Khilli Ram Meena hoa hman niin, Secretariat-a thawkte'n inpumkhatna thutiam an sawi rual. Rashtriya Ekta Diwas hi sorkar laipuiin India rama hnam hrang hrang leh ṭawng hrang hmangtute inunauna leh inpumkhatna lantirna atan hman tura a duan a ni.

Maths Competition

Mizoram Mathematics Society (MMS) chuan October 31, Inrinni khan Mizoram hmun hrang hrangah Mathematics Competition vawi 18-na an buatsaih a, inelnaa tel tura inziak lut zirlai 3,786 zinga 3,627 an inlan. Aizawlah chuan Pachhunga University College-ah buatsaih niin, zirlai 2,700 an tel a, exam centre dang 10-ah zirlai 919 an tel. Inelna hi pawl 5, 8, 10 leh 12 zirlaite tana buatsaih a ni.

Zîkhlûm Kût

Siaha district-a Siata khuaa T Samuela Farm-ah October 30, 2026 khan Zîkhlûm Kût (Cabbage Festival) hman a ni a, district bawrhsap Saizikpuii'n a hmanpui. Siata khuaah hian kumin aṭangin Horticulture department leh Sanghe MPACS ṭang dunin zikhlum chin rûnpui an kalpui a ni a, chhungkaw 73-in zikhlum an ching a ni.

SHG Mela khâr

Mizoram State Rural Liveli-hoods Mission, Hnahthial RD Block leh NABARD te chuan October 30-31, 2026 chhung khan Hnahthial Bazarah Helf Help Group Mela an buatsaih a, stall hrang hrangah SHG member-te'n Rs 2,80,550 hû an hralh. Inrinnia Mela khârna inkhawmah lawmman chi hrang hrang sem a ni a; Best Stall thlanaah pakhatna Thiltlang.