Mizoram dist 8-a kawng 45 sialna atan PMGSY IV-ah cheng vbc 710.45 pawm

Sorkar laipuia Ministry of Rural Development chuan Pradhan Mantri Gram Sadak Yojana (PMGSY)-IV hnuaia Mizorama kawng 45 sialna atan cheng vbc 710.45 a pawm

Sorkar thuchhuah tarlan danin, Mizoram PWD-in PMGSY-IV hnuaia kawng 45 sial tura a rawtna chu Ministry of Rural Development chuan a pawm a; October 9, 2026-a Empowered Committee ṭhukhawm thutlukna zûlzuia pawmna lehkha chu October 30, 2026 khan Mizoram PWD Secretary-in a dawng.

Kawng 45 sial tur hi Mizorama district pariata mi a ni a; kawng sial tur tam berna Mamit district-ah 12 awmin, Lawngtlai district-ah pakua, Lunglei district-ah pariat, Champhai leh Siaha district-ah paruk ve ve, Aizawl district-ah pahnih, Kolasib leh Serchhip district-ah pakhat ve ve a awm a ni.

Tarlan danin, PMGSY-IV hnuaia Mizorama kawng 45 sialna atan cheng vbc 710.40 ruahman a ni a; sorkar laipuiin cheng vbc 639.36 a tum dawn a, Mizoram sorkarin state matching share cheng vbc. 71.04 a tum ang.

Kawng 45-te chu belhkhawmin km 509.54-a thui a ni dawn a, khaw 48-te tan kumtluana lirthei kal theihna tur kawng ṭha siam tum a ni a; kawng siam hna thawh laiin quality control laboratory, geo tagging leh audit report hmangin endik leh vil reng tura ruahman a ni.

PMGSY-IV MIZORAM

District Kawng Thui zawng

Aizawl 2 km 15.700

Champhai 6 km 83.076

Kolasib 1 km 8.517

Lawngtlai 9 km 71.435

Lunglei 8 km 131.062

Mamit 12 km 111.262

Saiha 6 km 68.548

Serchhip 1 km 19.948

TOTAL 45 km 509.548