Puducherry sorkarin journalist pension a pe

Puducherry-a press tour neia thang mek Mizoram Journalists' Association (MJA) member-te leh Information & Public Relation (IPR) department official-te chuan nimin khan Puducherry sorkara IPR department pisa an tlawh. Puducherry IPR director MM Vinayaraj chuan, an journalist-te chu Puducherry sorkarin pension a pek thu a sawi.

MM Vinayaraj chuan, journalist kum 20 thawk tawh, kum 58 tlingte chu sorkarin pension a pek ṭhin thu sawiin, "Thla tin sorkarin Rs. 7,500 a pe a, pension atan hian journalist-te'n sum thawh (contribution) ve an nei lo. Journalist an thih chuan pension an lak ṭhin zatve an nupuite'n an lak chhunzawm thei. Tunah hian pension la mi 11 an awm mek," a ti.

Puducherry IPR Director sawi danin, accredited journalist-te chu sorkarin smart phone leh mobile phone subsidy-in a leisak ṭhin a, sorkar bus-ah a thlawna chuan phalsak an ni. IPR department-ah hian section pali - protocol, news, publication leh press a awm a, thawktu mi 50-60 vel an awm ṭhin.

MJA member leh IPR official-te hian nimin vêk khan khualzin tlawh nasat Auroville an tlawh a, khualzin an lo dawnsawn dan leh an hmunhmate an zir a ni. Vawiinah Puducherry sorkar hotute an kâwm leh ang.