Mizorama thil thar - Little Library

Mizo thu ziak mi leh chanchinbu-mi Lalhruaitluanga Chawngte, Mission Vengthlang chuan an in bula kawng­pui kamah Little Library an siam a, lehkhabu ṭhahnem tak dahin, kawng­puia kal a duh apiangin an chhiar ṭhin.

Lalhruaitluanga Chawngte chuan, mi ramah lamliana kal velte'n an duh duha an chhiar turin library a awm ṭhin tih a hriatin ṭha a ti a, a awt ve ṭhin tih sawiin, "Ka ngaihtuahna leh suangtuahna a luah fo. Miin mak min ti palh ang tih te, mi nuih kan tiza palh ang tihte hlauhthawnna a awm ṭhin. November 4, 2019 tlai dar 4:01-ah kan kawt kawngpui ânah min duhsaktu Rika (Rinzama) chhuar min siamsak chu kan húng ve ta râwih mai a ni," a ti a; Little Library an kalpui ṭan ni chu a pa Rev. C Lianhmingthanga pian champha a nih thu a sawi.

Little Library hi a siamtute in kawt kawngpui kamah, huan pal beh­chhana siam a ni a, lehkhabu chhuar dahin, chutah chuan lehkhabu eng emaw zat dah a ni. Lalhruaitluanga Chawngte chuan, Little Library chu a rin phak bâkin miin an ngaihlu tih sawiin, "Miin hetiang taka an lo ngaihhlut avang hian keini chhung tak pawh hian kan ngaihlu zual. Chutih rualin, insit a na lehling a, a aia ropui zawka tihte a chakawm. Miin an lo ngaihlu der ve hi lehkhabu kan ngaihlu tih a lang tihnaa ka ngaih avangin lawmawm ka ti tak zet a ni," a ti.