KHAWTHLIR

Republic Veng Branch YMA office leh committee room thar chu nimin khan bialtu MLA (Aizawl South-I) C Lalsawivunga'n a hawng. C Lalsawivunga chuan, YMA-in kumpuana 'Zirna uar kum' an hmang chu lawmawm a tih thu sawiin, "Lehkha zir hi kan uar deuh deuh a ngai. Mizo zingah central service awm belh zel se, kan hnam tan a pawimawh. Kan bial aṭang ngei hian awm se tih hi ka duhthusam a ni," a ti. Office leh committee room hawn tâk siam nan Rs. 7,50,000 vel hman a ni a, committee room chu mi 60 ṭhut theihna tura siam a ni.

Zoram Thar chuan nimin khan Aijal Club-ah Zo fate insuihkhawmna atana rorelna inpui tur, Zofate Lairelna (Zofate Committee) an din. Inkhawm hi Zoram Thar general secretary Lalruatfeli Hlawndo-in a kaihruai a; Zoram Thar hotu Rev.Dr Zai-chhawna Hlawndo-in thu a sawi bakah, thupui hrang hrang zirho a ni. Zaichhawna chuan, "Zo fate hnama min dintu Isua Krista kaihhruaina rinchhanin chhiahhlawh hna kan thawk dawn a ni," a ti.

Saitual Welfare, Aizawl chuan nimin khan Ramhlun Indoor Stadium conference hall-ah General Body Meeting leh district thar lawmna an buatsaih a, bialtu MLA R Lalzirliana, minister chu khuallian niin, Saitual DC C Lalpeksanga khualzahawm a ni. R Lalzirliana chuan, Saitual district tihpuitlin a ni chu Pathian ruat a nih thu sawiin, "Sorkar kal dan tâwk ang zelin kan kal tur a ni," a ti.

All Mizoram Farmers’ Union (AMFU) chuan nimin khan Central YMA Hall-ah an kum 25-na, silver jubilee an lawm a, deputy chief minister Tawnluia khuallian niin, Agriculture Development Board vice chairman H Biakzaua, MLA khualzahawm a ni. Tawnluia chuan, ram hmasawnna bul chu agriculture-ah a innghat thûk tih sawiin, "Ei leh bàr, silh leh fèn, sum leh paia ram mipuite intodelhna tur khawp Mizoram leilungah a awm a ni," a ti a; AMFU chu SEDP hlawhtlinna turin an pawimawh thu a sawi.