Zirnaah neitu rilru i pú ang u - Edn. Minister

Phulpui khua chuan Thawhṭanni zan leh nimin khan an khaw mi leh khaw chhuakte 'Haw rûnpui' leh Phulpui Middle School kum 40-na, ruby jubilee lawmna hun an hmang. November 11, Thawhṭanni zana hmanpuitu School Education minister Lalchhandama Ralte chuan, khaw­tlang mipuite chu zirnaah neitu thinlung pu thar turin a sáwm.

Lalchhandama Ralte chuan, Phulpui khua aṭangin mi hlawhtling tak tak an chhuak tawh ṭhin tih sawiin, "Pu H Vanlalauva, minister lo ni tawh chu ministry hmasa lamah sorkar thluak bûr tih mai tur a ni. Phulpui hi khaw chhuanawm tak a niin ka hria a, in kurtai thar chhuah pawh Aizawla mi duh pawl tak a ni," a ti.

School Education Minister chuan, Mizoram sorkar tharin zirna chu ngaih pawimawh ber­ah a nei mek tih sawiin, "Bud­get hmasa berah pawh 24% aia sangin duhsakna a lantir a, zirna lama hmasawnna hi hmasawnna rahbi dik a ni tih sorkarin a hria a ni. Zirna kawngah hian khaw­tlangin neitu thinlung i pu thar ang u," tiin khawtlang mipui a sáwm.

Lalchhandama Ralte chuan, "Tun hma chuan school compound hi khawtlangin an ît ngai lo a, tun­ah erawh chuan kan ît ta fo mai. Zirnaah hian sorkar leh mipui kan ṭhanharh a ngai hle a, kan ramah zirna lamah harhna a thlen a ngai a ni," a ti a; sikul thawm ṭhat leh tuaihnûm chungchangah, sorkar kut nghak kher lo a, neitu nihna thinlung aṭanga sikul dinhmun hre tura lo thlithlai fo leh sikul thawm ṭhat ṭhin a ṭul thu a sawi.

School Education Minister hi bialtu MLA Prof. F Lalnunmawia, Horticulture Board vice chairman ni bawk leh Veterinary & Fishery Board vice chairman C Lalmuanpuia, MLA ten an ṭawiawm a ni. Phulpui M/S ruby jubilee lawmna leh haw rûnpui hi an khawtlang leh Aizawl Phulpui Insuihkhawm (API) buatsaih niin, nimin khan hman chhunzawm a ni a, bialtu MLA Prof. F Lalnunmawia khuallian a ni. Phulpui khaw mi hmun danga awm mekte leh an khua aṭanga pém chhuaka khaw danga awm tawh mi ṭhahnem tak an tel a, tlaiah ruai an ṭheh a ni.