IGNOU-in campus placement tih a tum

Nimin khan Ser­chhip College-ah IGNOU Study Centre thar hawn a ni a; hawnna inkhawm hmanpuitu, IGNOU Mizoram regional director Dr SR Zonunthara chuan, IGNOU Mizoram Regional Centre hnuaia zir chhuakte hna zawnpuina atan campus placement neih tuma hmalak mek a nih thu a sawi.

Dr SR Zonunthara chuan, Indira Gandhi National Open University (IGNOU) chu kum 1985-ah Parliament-in dan a pass anga din, central university a nih thu a sawi a, "IGNOU-in a tum ber chu, zirna-in pang­ngaia kal thei tawh lote tan remchang siam­sak a, a mamawhtute'n zirna sang zawk an zir zel theih a ni," a ti.

IGNOU Mizoram Regional Director sawi danin, India ramah IGNOU regional centre 67 a awm mek a, Mizoram Regional Centre hnuaiah study centre 43 a awm. IGNOU-ah hian schedule tribe leh schedule caste-te tan bachelor degree leh a hnuai lam zirna chu a thlawn veka pek a ni a; zirna pangngai (general line) bakah, hna zawnna atan leh eizawnna atana ṭangkai tur zirna (professional course)-ah certificate leh diploma course eng emaw zat zir theih a ni.

Serchhip College-ah IGNOU Study Centre (Centre-1914) hawnna inkhawm hi coordinator K Laldinpuii'n a kai­hruai a; Serchhip College principal PC Lalremsiama chuan, ràl aṭanga lehkha zirna (distance education)-ah chuan IGNOU aia ṭha India ramah a awm loh thu sawiin, "IGNOU zirna hi a hniam lo a, IGNOU-a zirlaite hi inngaih hniam loh tur. Khawvel ram dangah pawh IGNOU hi a inzár pharh tawh a, mi tam takin an hnaa ngheh nan leh kaisanna atan an hmang ṭangkai tawh a ni," a ti.

IGNOU Mizoram Regional Centre hnuai­ah hian study centre 43 awm­in, academic counsellor 152 an awm a, zir theih (course offer) 64 awmin, mi 20,000 vel­in an zir mek. Serchhip College Study Centre-ah chuan zirlai 389 an awm mek a ni.