Minister-in UDPA hnathawhte a enfiah; Hun tiama zo ngei turin thawktute a chah

Urban Development & Poverty Alleviation (UDPA) minister K Sapdanga chuan nimin khan UDPA department bakah, Mizoram Urban Development Agency Limited (MUDAL) leh Public Works department (PWD) hnuaia hnathawhte a hmunah a en a; thawktute chu hun tiam chhunga thawk zo ngei turin a chah.

UDPA Minister chuan, hna thawh mekte chu Aizawl hmasawnna tura pawimawh tak tak a nih thu sawiin, "Ṭha taka hna thawh a nih ngei kan duh. Ṭha takin, hun tiam chhungin a thawktute'n zawh ngei an tum tur a ni a, official lam pawhin ṭha takin an vil chhunzawm tur a ni," a ti a; harsatna an nei a nih chuan thuneitute hnena thlen turin thawktute a chah.

Minister ho hian PWD hnuaia Solid Waste Mangement Center, Hualngohmuna siam mek an tlawh hmasa ber a; chumi hnuah MUDAL hnuaia project pathum - Venghnuaia Community Recreation Centre, Zemabawk Field-a khelmual chei ṭhat, New Market-a City Centre tur leh Zodin Square-a Multi Level Car Parking tur siam mekte an tlawh a ni.

UDPA Minister hi UDPA secretary V Lalsangliana, additional secretary CC Lalchhuangkima, director Jacob Lalawmpuia, joint secretary Lalrinawmi Fanai leh official dangte'n an ṭawiawm.