Khawlaia insual buai chíngte lakah Police-in na takin action la zel dawn

Aizawl district superintendent of police Zosangliana chuan nimin khan thuchhuah siamin, khawlaia insual buai chíngte lakah a na thei ang berin action lak zel tum a nih thu a tarlang.

Aizawl SP chuan, "Khawlaia insual buai ching lakah a na thei ang bera action lak zel tum a ni. Aizawl khawpui huam chhungah hian police patrolling neih ṭhin a ni a, police patrolling party awm remchan lohna hmunah hetiang thil thleng a awm a nih chuan a rang lamin 112 ERSS leh police station-ah hriattir ṭhin turin mipui kan ngen a ni," a ti.

Ṭhalai tan thubuai neih a hlauhawm tih sawiin Aizawl SP chuan, "Police-ah thubuai kan neih chuan dam chhung criminal antecedent kan nei dawn a, hei hi kan hma lam hun zelah harsatna tam tak a thlen thei. Intihbuaina thleng tawh lo se kan duh a, a thleng a nih chuan na takin an chungah action lak a ni zel dawn a ni," a ti bawk.

Aizawl SP tarlan danin, Pathianni zan zanlai pelh hnu, nimin zing dar 2 vel khan Bawngkawn leh Ṭhuampui inkar NH kawngpuiah mipa rual insual buai an awm a, inhnamhnawih mi 10-te chu police-te'n manin, Bawngkawn Police Station-ah BNS Section 194(2) leh Section 125 tlawhchhanin thubuai an siamsak a ni.