MNF sorkar hlawhchhamah an puh

Congress party ṭhalai, Mizoram Pradesh Youth Congress Committee (MPYCC) chuan thuchhuah siamin, MNF sorkar chu mipui ni tin mamawh phuhrûk kawnga hlawhchhamah an puh.

MPYCC chuan, MNF sor­kar hnuaiah Mizoram hmun hrang hrang­ah kawlphetha a mumal lo hle nia sawiin, "Mipui hriattir lâwk loha êng tihthim a tam ta lutuk te, Inrinni leh sorkar chawlha electric chhe siam chhuanlama mipui tibuai zawnga êng tihthim rengte hi hriatthiam har kan tiin mak kan ti a ni," an ti a; mipui harsatna belhchhah turin electric bill a tam tulh tulh niin an sawi.

MNF sorkarah mipui tawrhna a thleng mek nia sawiin MPYCC chuan, "Veng tam takah tui a haw ṭha lo a, harsatna a thleng a, tui bill a pung tual tual. Mipuite'n an ei ber ration buhfai chhe tak tak sem a ni a, retailer-te'n kudama buhfai ṭha thlan chawp ngai khawpa buhfai chhia supply a ni. Hmun ṭhenkhatah chuan buhfai thûr sem a nih thu sorkar pawhin a zêp zo ta lo. Buhfai supply-tute lah sorkarin a ngam bawk si lo," an ti.

Congress ṭhalaite chuan, eirawngbawlna gas a harsa mek nia sawiin, "Kristiante hunpui lo thleng tur pawh a huphurhawm a, Zoram hmun hrang hranga mipui an mangang tawh tak zet a ni," an ti a; sorkar chak leh chak lo tehna ber - mipui ni tin mamawh phuhrûk kawngah MNF sorkar chu a hlawh­chham hlea an ngaih thu an sawi a ni.