KHAWTHLIR

Hnam dang officer hoin Mizo ṭawng zir

DPAR leh ATI chuan Mizorama all India service officer zinga hnam dangte tan October 8-28, 2026 chhung khan Mizo ṭawng leh nunphung zirna, 'Training on Mizo language, culture, society and value system' an buatsaih. Training hi tlai dar 4-5 inkarah neih ṭhin niin, Mizorama hnam dang IAS, IPS leh IFS officer 41 tel tura ruahman a ni a, officer 19 chu district-a awm an nih avangin online-in an tel ṭhin a ni.

Himna tur sawiho

Serchhip SP Dhirendra Pratap Singh hoin a pisaah nimin khan Serchhip Chamber of Commerce hruaitute leh police hotute'n Serchhipa rûkrûk leh dawr rawk hluar zel ven dan tur an sawiho. Dhirendra Pratap Singh chuan, dawrkaite chu an dawr himna atan leh rûkru venna atan a theih ang anga CCTV vuah turin a ngen a, Serchhipa ruihhlo zuarte leh ruihhlo ngaite pun khawmna hmunte police-te'n ngawrh zawka an vil tur thu a sawi.

Lawmman dawng

National Cadet Corps-te inelna, All India Inter Directorate Drone Competition 2026-ah 1 Mizo Air Squadron cadet pahnih telna North Eastern Region (NER) Directorate an champion. Inelna hi Tamil Nadu-ah neih a ni a, NER Directorate hian champion trophy bakah, Best in Flying trophy leh mimal lawmman 'Best in Flying Girl Cadet' an dawng a ni.

Sports Meet ṭan

Central Government Employees Welfare Coordination Committee (CGEWCC) chuan nimin khan PUC auditorium-ah Inter-Departmental Sports Meet 2026 an ṭan a, PUC principal Prof. H Lalthanzara'n a hawng. Sports Meet hian November 6, 2026 thleng a awh dawn a, sorkar laipui hnuaia department leh institution hrang hrang 13 an tel a ni.

Leadership zirhona

India hmarchhak biala college principal-te tana leadership development chungchang zirhona, ni nga awh tur chu nimin khan MZU-a Education department-ah ṭan a ni a, Higher & Technical Education minister Dr Vanlalthlana'n a hawng. Minister chuan, India ramah university 1,200 vel, college 40,000 vel leh zirlai nuai 450 vel an awm mek thu a sawi.