Family pension late Treasury-ah an inlan; Lungleiah mi 1 insawifiah tura hriattirna pe

Dan loa family pension late zawn chhuahna kal zelah nimin aṭang khan Aizawla Treasury office-ah pensioner-te leh family pension la, anmahni ngei inlana enfiahna ṭan a ni. Lungleiah chuan nimina endiknaah dan loa family pension la nia rinhlelh kai mi pakhat hnenah insawifiah tura hriattirna, show cause notice pek a ni.

Pensioner leh family pension la, Treasury office-a inlante chu an life certificate, marriage/re-marriage certificate, income certificate, Aadhaar card te endik a ni a, an hmel leh pension payment order-a thlalak a inmil leh imil loh enfiah a ni bawk.

Pensioner zinga tar chak lo leh dam lohna vanga harsatna neite chu application dang hmang emaw, Treasury office-a thawkte'n an ina kal chilh emawa endik an nih tur thu Finance department hotute chuan an sawi.

Tun dinhmunah pensioner leh family pension la Aizawl South Treasury-ah mi 19,000 vel an awm a, Aizawl North Treasury-ah mi 2,707 an awm a ni.

Hetihlai hian, Lunglei district-a Task Force chuan Treasury officer Lalruatzeli hoin Lunglei district-a family pension la mekte an awmnaah kal chilhin, dan anga family pension la an nih leh nih loh an endik ṭan a; rinhlelh kai mi pakhat hnenah insawifiah tura hriattirna, show cause notice an pe.

Mizoram sorkar chuan document dik lo hmanga family pension late tan July 1, 2026 aṭanga September 30, 2026 thleng mahni duh thua Pension Payment Order (PPO) pek kir (surrender) theih hun a hawng a; chumi chhung chuan Lunglei district-ah PPO pe kîr mi 137 an awm.

Dan loa family pension la, hun hawn chhunga PPO pe kir lote chu an chungah dan anga hmalak tur a ni a, hun tiam chhunga PPO pe kir lo an awm leh awm loh Task Force-te'n an endik mek a ni.

Lunglei district-a task force-te hian November 2-13, 2026 chhungin Lunglei khawpui chhunga fa,mily pension late an endik dawn a, chumi hnuah district chhunga khaw dangah an endik leh ang.