Bawlhhlawh sâwngbâwl chungchang Serchhip MJA-in Bawrhsap an sawipui

Serchhip District MJA chuan October 28, 2026-a Lungrual rama bawlhhlawh sawngbawlna, Solid Waste Management Centre (SWMC) an tlawhna aṭanga ṭha zawk leh him zawka bawlhhlawh sâwngbâwl theihna tura rawtna an neihte nimin khan district bawrhsap Paul L Khuma hnenah an thlen.

Serchhip MJA chuan, SWMC hmunah in sakna leh ṭhiahna bungraw chhia sawngbawlna tur a awm loh avangin bawlhhlawh khawntute'n mipui aṭangin an la thei lo tih an sawi a; mipui tan harsatna thlentu a nih avangin, in sakna leh ṭhiahna bawlhhlawhte paihna hmun tur a rang lama ngaihtuah ṭul an tih thu an hrilh.

SWMC-a bawlhhlawh lak khawmte chu a dah khawmna tur inah a len loh avangin tam tak chu pâwnah dah a ni tih sawiin, "Heng bawlhhlawhte hi ruahin a nan a, bawlhhlawh aṭangin ṭhil tha lo tam tak a luang chhuak thei a, a thlang lawkah Serchhip mipui tui tlan, Tuikum lui a awm avangin, ruahin a nan theih lohna tur hmun hula dah ngei a ṭul," an ti.

SWMC chu bawlhhlawh ṭawih thei lo sawngbawlna tur hmun a nih laiin, mipuite'n ṭawih thei lo karah ṭawih thei an dah tel ṭhin thu sawiin Serchhip MJA chuan, "Hei hi mipui hriselna khawih thei thil a nih avangin mipuite’n ṭha zawk leh fimkhur zawka bawlhhlawh an thliar theih nan mipuite hnenah zirtirna pek nasat lehzual emaw, bawlhhlawh thliar ṭha lote hrem emaw a ṭul," an ti a; bawlhhlawh ṭawih thei aṭanga leiṭha siamna tur ruahman ni se ṭha an tih thu an thlen.

Serchhip District MJA chuan, bawlhhlawh lak khawmte hi SWMC-ah a inchhêk khawl tam loh nan rang taka thliar hrang zung zung a ṭul thu leh thawktu tam zawk an awm a ṭul thu te, Serchhip khawpui pumpui leh district-a thingtlang khuate bawlhhlawh zawng zawng sawngbawl thei tur SWMC neih a ṭul thute an sawi bawk.

Serchhip Lungrual rama SWMC hi August 4, 2025 aṭanga hman niin, Green Herd-in bawlhhlawh ṭawih thei lote an sawngbawl a; bawlhhlawh tawih thei chu Dawngzawla UDPA bawlhhlawh paihna hmunah paih ṭhin a ni.