Children’s Week pualin hun hman a ni
Nimin khan Lunglei leh Mamitah November 14-a Children's Day thleng tur pualin Children's Week hawnna hun hman a ni a, naupangte nen hlim taka hun hman a ni.
Lungleiah chuan Ṭhuamluaia Mualah Children Week hman a ni a, Lungleia district child protection officer (DCPO) H Lalrinkimi'n kaihruaiin, DIET principal H Lalzarliana khuallian a ni. Khuallian chuan, khawvel pumah kum tin November 14-ah Naupangte Ni ropui taka hman ṭhin a nih dan te, naupangte mawhphurhnate a sawi. He hunah hian infiamna leh intihhlimna hrang hrang 30 chuang an buatsaih.
Mamitah chuan GSA Playground-ah Mamit District Child Protection Unit (DCPU) huaihawtin Children's Week pualin Fun Day hman a ni a, thupui chu ‘Happy childhood’ tih a ni. Hawnna inkhawm chu Mamit DCPO Vanlalruati'n a kaihruai a, Mamit SP Shashank Jaiswal-in a hawng.
Shashank Jaiswal chuan, Mamit khawpuia naupangte’n hlim taka hun an hman theihna tura ruahmanna siam a ni chu finthlak a tih thu sawiin, "Kan ram a naupangte himna leh hlimna chu mi tin kutah a awm. Puitlingte leh khawtlang mipuite kan thawhhona a pawimawh a, kan ṭan rual thiam a ṭul," a ti a; Mamit district-a naupangte'n harsatna an nei a nih chuan anmahni pui turin engtik lai pawhin police-te an awm thu a sawi.
Fun Day-ah hian naupang intihhlimna chi hrang hrang buatsaih a ni a, child care institution (home/centre)-te'n intihhlimna naupangte tan man chawi loa hman theih turin intihhlimna hmanraw chi hrang hrang an thawh a ni.