KMMTTP kawng dan tumtute harsatna chinfel dan tur Bawrhsap hoin sawiho

Lawngtlai DC Donny Lalruatsanga, Central YLA hruaitute leh Kaladan Multi Modal Transit Transport Project (KMMTTP)-in a paltlang ram neitute, Lawngtlai District Land Owners' Association hruaitute chuan nimin khan DC pisaah KMMTTP siamnaa zangnadawmna la pek loh chungchang an sawiho. Ram neitute hian November 15, 2026 hmaa an thil phût a hlawhtlin loh chuan KMMTTP dan an tum thu an sawi.

Lawngtlai District Land Owners' Association (LDLOA) hian October 29, 2026 khan thuchhuah siamin, KMMTTP kawngpui laihin an ram a tihchhiat avanga High Court pawhin zangnadawmna pek tura a tih hnuah zangnadawmna an la dawn loh avangin November 3, 2026 aṭangin KMMTTP kawng dan an tum thu an tarlang. Mahse, Lawngtlai DC-in a ngen angin kawng dan an tum an ṭhulh leh rih a ni.

Lawngtlai Bawrgsap chuan, KMMTTP-in a paltlang mimal ram nei mi 138-te tan sorkarin theihtawp a chhuah thu sawiin, "Ministry of Road Transport and Highways (MoRTH)-ah DPR thehluh tawh a ni a, Mizoram Chief Secretary pawhin Prime Minister's Office-ah meeting a nei tawh," a ti a; nimina an ṭhutkhawma an thu relte chu Chief Secretary hnenah a thawn ang a, CS-in a ṭul angin a bawhzui dawn thu a sawi.

LDLOA hruaitute chuan, a hma thei ang bera an thil phûtte tihhlawhtlin chu an duh ber a nih thu leh, November 15, 2026 hmaa tihhlawhtlin a nih loh chuan kawngpui dan an tum thu an sawi a; KMMTTP kawngpuiin a paltlang ram hectare 196.75-a zau chhunga forest ram nia chhàl hectare 84.65-a zau chu mimal ram a nih thu an sawi bawk.