THE World University Rankings 2027-ah 800 - 1,000-na inkarah MZU a awm

Mizoram University chu Times Higher Education (THE) World University Rankings 2027-ah khawvela university ṭha thlanah 800-1,000 inkarah dah a ni.

MZU tarlan danin, THE World University Rankings 2027 chu tun hnai khan tihchhuah a ni a; ram 118-a university 2,297-te chu ranking pek an ni. MZU hi rank 801-1000 inkarah a awm a; a tih ṭhatna ber chu zirbingna (research)-ah a ni a, zirtirna (teaching)-ah dinhmun ṭha takah a awm bawk.

Zirbingna (research) lamah MZU leh a hnuaia college hrang hranga thawk mi 13 chu Stanford-Elsevier chuan kum 2026-a a tihchhuah khawvela scientist langsar ber za zela pahnih (top 2%) zingah a telh a ni.

MZU-in a campus chhunga environment humhalhna lama hma a lakna chu UI GreenMetric World University Rankings 2026-ah chhinchhiah a ni a; he ranking-ah hian MZU chu khawvel pumah 1,511-na niin, Certificate of Achievement a dawng.

MZU thuchhuah chuan, "Heng hlawhtlinna hrang hrangte hian MZU-in zirna, research leh environment humhalh kawnga hma a sawn zel dan a lantir a, India ram mai bakah, khawvel huap zirna sangah pawh a hming a langsar sâwt zel a ni," a ti.