Aizawlah Plastic Free City Rally buatsaih a ni

Aizawl Municipal Corporation (AMC) chuan, Aizawla plastic khap leh hman tlem an kalpui mek bawhzuina atan nimin zing khan sikul naupangte tan Plastic Free City Rally an buatsaih a, naupang ṭhahnem tak an tel.

Plastic Free City Rally-ah hian zirlai naupangte'n Chanmari leh Sikulpuikawn aṭangin kawng an zawh ṭan a, Lammualah an intâwk khawm a ni. High school leh higher secondary school zirlai 1,000 chuang an tel a, plastic hman ṭhat lohzia ziahna thuziak an keng.

Lammualah inkhawm tawi buatsaih a ni a, AMC mayor PC Lalhmingthanga leh chief secretary Lalnunmawia Chuaungo ten an hmanpui. AMC Mayor chuan, Aizawl khawpuia chengte chu bawlhhlawh paih danah leh faina leh thianghlimna kawngah an ṭhangharh mek tih sawiin, "Local council-te nen ṭangruala bawlhhlawh paih dan kalpui mekah mipui ṭawiawmna kan hmu ṭha a, a lawmawm hle a ni," a ti.

Aizawl Mayor chuan, Aizawl chu Smart City-a puan a nih tawh thu sawiin, chumi bawhzuina atan chuan plastic a tlem thei ang bera hman leh vawi khat hmana paih mai ang chite chu khap a nih dawn thu leh, Aizawl chu Plastic Free City-ah puan tuma hmalak mek a nih thu a sawi bawk.

Chief secretary Lalnunmawia Chuaungo chuan, sikul naupangte chu plastic hmang lo tura ngenin, plastic-in hriselna a tihchhiat dante a sawi a; ni tin nunah plastic tel loa khawsa thei tura inzir a ṭul thu sawiin, "Naupangte aṭanga plastic hman loh kan inzirtir chuan, hun kal zelah ṭhangtharteah awmzia thui tak a nei dawn a ni," a ti.

Lammuala hun hmanah hian AMC commissioner K Lal­dingliana'n plastic khap chung­changa AMC hmalak dante a sawi a; AMC councillor Zonun­sangi Fanai kaihhruaiin plastic bawlhhlawh siam lo tura intiamna thu sawi rual a ni.