Mizoramah PM SVANidhi loan mi 4,786 hnenah vbc 8.21 pe tawh

Khawlaia thil zuarte'n eizawnnaa harsatna an tawhte loan hmanga phuhrûk sakna tura Ministry of Housing & Urban Affairs-in a duan PM SVANidhi hnuaiah Mizoram mi 4,786 hnenah loan cheng vbc 8.21 pek a ni tawh. UDPA department chuan City Livelihood Centre, Zodin Square-ah PM SVANidhi Loan Camp an buatsaih mek.

PM SVANidhi Loan Camp hian November 6, 2026 thleng a awh dawn a, camp a tawp hunah pawh UDPA directorate bakah, district tina UDPA pisaah loan dil theih reng a nih dawn thu UDPA department hotute chuan an sawi.

UDPA hotute sawi danin, PM SVANidhi hian dawr hmun nghet nei loa khawlaia thil zuarte bakah, dawr nei loa miin in lama an koh ṭhin beautician-te pawh a huam. Loan vawi khatnaah Rs 15,000 lak theih a ni a, vawi hnihnaah Rs 25,000 leh a vawi thumnaah Rs 50,000 lak theih a ni. Loan rûl ṭhate tan sorkar laipuiin an loan pung 7% a rulhsak ṭhin.

Mizoramah PM SVANidhi kaltlangin mi 4,786 hnenah loan cheng vbc 8.21 pek a nih tawh thu sawiin UDPA hotute chuan, "Loan rûl ṭhate hnenah an loan pung rulh nan sorkarin Rs 9,00,000 vel a pe tawh. Mizoramah chuan Mizoram Rural Bank-in mi 3,195 hnenah PM SVANidhi loan cheng vbc 5.31 pe tawhin, loan pe tam ber an ni a, State Bank of India-in dawtin, SBI hian mi 1,341 hnenah loan cheng vbc 2.46 an pe tawh," an ti a; Mizoramah PM SVANidhi loan dilna lut tawh zat chu 5,786 a nih thu an sawi.