Hâlpuah khapna kenkawh dan tur rêl

Nimin khan Secretariat conference hall-ah hâlpuah leh hâlmawi khuahkhirhna dan thar, The Mizoram Fireworks Regulation Act, 2026 kalpui dan tur leh Krismas vuakvet hmaa hâlpuah leh hâlmawi Mizorama rawn lut tur dan dan tur sawiho a ni.

Ṭhutkhawm hi Home minister K Sapdanga'n a kaihruai a, chief secretary Khilli Ram Meena, DGP Sharad Agarwal, Aizawl DC leh SP, IPR Director, Aizawl Municipal Corporation aiawh, Central YMA leh Mizoram Merchants Association (MIMA) hruaitute leh, Home department leh General Administration depatrment hotute an tel.

The Mizoram Fireworks Regulation Act, 2026 zau zawka chanchinbumi te, kohhrante leh khawtlang hruaitute kaltlanga mipui hnena zirtir dan tur sawiho a ni a; Krismas vuakvêt hmaa hâlpuah leh halmawi Mizorama rawn lut tur dang tura MIMA nen ṭanghoa hmalak dan tur te, halpuah hâl lo tura mipui ngen dan turte sawiho a ni bawk.

K Sapdanga chuan, Mizorama hâlpuah leh a kaihhnawihte khapna dan kalpui tawh dan tlangpui sawiin, khuahkhirhna khauh tak kalpui aiin, halpuah hâl nghawng ṭha lote inzirtir paha hâl lo tura inngenin awmzia a neih thui zawk a beisei thu a sawi.

Home Minister chuan, YMA chu ram nuam, fai leh thianghlim ni tura hma latu pawl pawimawh tak an nih thu a sawi a; halpuah chungchanga sorkar hmalaknate a hlawhtlin theih nan sorkar, kohhran, khawtlang, YMA leh sumdawng pawlte ṭan rual a pawimawh thu a sawi bawk.

Home secretary Vanlalmawia sawi danin, The Mizoram Fireworks Regulation Act, 2026 hnuaiah hâlpuah leh hâlmawi te kawl, zawrh leh hâl te khap a ni a; he dan thar kengkawh tura high level committee, district supervisory committee leh local supervisory committee din dan turte a chuang.