Operation Trident a hlawhtlin avangin MZP-in Home dept. lawmpuina an hlan; 'Ruihhlo tawlh rutute kan ûmzui zel dawn' - HM

MZP hruaitute chuan nimin khan ruihhlo tawlhrutute man chhuah beihpui thlakna, 'Operation Trident' hlawhtling taka kalpui a nih avangin Home minister K Sapdanga pisaah Home department lawmpuina an hlan. Minister chuan, ruihhlo tawlhrutute chu an thlir liam dawn lo a, an ûmzui zel dawn thu a sawi.

Home Minister chuan, Operation Trident chu ruihhlo do beihpui thlakna a ni satliah lo tih sawiin, "Ruihhlo chi hrang hrang hralh rûk dan leh tawlh ruk dan hnuk chhui a, chhut chahna tur beihpui thlakna a ni. Tun hma chuan ruihhlo tawlh rutu liante'n an chhawrte kan man thei ṭâwk. Hnu kan chhui a, state force-te'n an tih theih loh chin a awm a, Central-ah kan thlen. Ministry of Home Affairs chuan Narcotic Control Bureau leh Enforcement Directorate te hmangin, Mizorama force mite tha chaknain beih a ni," a ti.

K Sapdanga chuan, khawchhak aṭanga ruihhlo rawn lut a rêm vek lo a nih pawhin a silawng viau tura an ngaih thu sawiin, "Kan hlawhtling ta tiin kan ṭhu mai dawn lo. Ruihhlo tawlh rutute hi kan thlir liam dawn lo a, tlawmngai pawlte nen ṭang tlangin kan ûmzui zel dawn. Ruihhloin a khawih nasat berte chu zirlaite an ni a, MZP-te'n ruihhlo tawlhruk invei hi a lawmawm," a ti a; sorkar, tlawmngai pawl leh kohhrante an ṭanho chuan ruihhlo an tukzal theih ngei an beisei thu a sawi.

YMA, YLA leh MTP ten 'Ruihhlo do' kum an puan mek thu sawiin K Sapdanga chuan, "Kan bawhzui zel ang a, a ṭul phawt chuan NCB leh ED hnenahte kan la zualko leh ang. Operation hi Mizo mipuite tan a hlu tak zet," a ti. Operation Trident pawimawhzia hriaa lawmpuina hlantu zawng zawng chungah an lawm thu leh, lawmpuina thuziak nena lawm thu sawitu MZP chungah an lawm thu a sawi bawk.

MZP president C Lalremruata chuan, Mizorama ruihhlo hluar em em karah Home Minister kaihhruaina hnuaiah police-te an che ṭha hle tih sawiin, "Lawmpuina hlan tlak niin kan hria a, hotupa ber Home Minister hnenah department lawmpuina kan hlan a ni. Operation Trident hi Mizoram Police chauhin an tih a ni lo tih kan hria a, mahse, an hmalakna ropui kan ti hle a ni," a ti.

Tun hma aṭangin MZP-in ruihhlo an do tawh ṭhin thu sawiin MZP President chuan, "MZP Assembly neih zawh takah ruihhlo do chungchang agenda-ah a lo lut. Khawchhak lamah ruihhlo kengtuah middle school zirlaite an hmang tih kan hriatin kan rilru a na hle a, chuvangin, ruihhlo do hi agenda kan pawm zingah a tel," a ti a; zirlaite zingah ruihhlo ṭhat lohzia inzirtir turin dan kengkawhtute nen ṭanghoa theihtawp chhuah an tum thu a sawi.

Home Minister hi IGP H Ramthleng­liana, Aizawl SP Zosangliana leh CID (Special Branch) SP Stephen Lalrinawma ten an ṭawiawm a ni.