KHAWTHLIR

NERPC chairman-ah F Rodingliana ruat

Sorkar laipuia Ministry of Power chuan Mizoram Power & Electricity minister F Rodingliana chu North Eastern Regional Power Committee (NERPC) chairman atan a ruat. NERPC hi Electricity Act, 2003 behchhana Ministry of Power hnuaia din niin, hmarchhak state pasarihte member an ni a, F Rodingliana hi Mizorama Power minister ni tawh zinga chairman ni hmasa ber a ni. Chairman atana ruatna hi Power Minister chuan November 2, Thawhṭanni khan a tichhuak.

Mei zu mi 4 man

Aizawl District Anti-Tobacco Squad chuan nimin khan New Secreta-riat-ah phal lohna hmuna mei zu an awm leh awm loh an endik a; Cigarettes and Other Tobacco Products Act (COTPA), 2003 Section 4 (puipunna hmuna meizûk khapna) tlawhchhanin phal lohna hmuna mei zu mi pali manin, pawisa an chawitir.

Bawlhhlawh paih lo turin mipui ngen

Aizawl Venglai Faina Committee chuan, an veng chhung leh kawngpuiah bawlhhlawh reng reng paih phal a ni lo tih tarlangin, an thuchhuak hi zâwm turin mi tin an ngen. "Aizawl Venglai huam chhungah leh kawngpuiah bawlhhlawh eng chi mah paih phal a ni lo. Motor tlan lai aṭanga bawlhhlawh paih chhuah te, meizial bung leh kuhva ei bâng kawngpuia paih leh chhâk ṭhin te phei chu a ṭul anga ûm zui zel tum a ni," an ti.

SWMR inzirtir

Lunglei Municipal Council chuan nimin khan Lunglei Convention Centre-ah local council paruk - Zotlang, Serkawn, Zohnuai, Farm Veng, Salem Veng leh Sethlun local council member-te pualin bawlhhlawh sawngbawlna dan thar, Solid Waste Management Rules (SWMR), 2026 chungchang zirhona an buatsaih. LC member-te chu an veng chhungah mi dangte zirtir chhâwng tura ngen an ni.

EMRS sak endik

Khawzawl DC K Vanlalṭhiana chuan nimin khan Khawzawl Darngawn rama Eklavya Model Residential School (EMRS) sak mek a endik a; thawktute chu harsatna an nei a nih chuan a rang thei ang bera a hnena thlen ṭhin turin a chah. Hnathawh chhunzawm zel dan tur leh hmachhawpte a sawipui bawk.