Pension late endik mek, an intlar thui

Accounts & Treasuries hnuaia Treasury office-te chuan Finance department thuchhuak bawhzuiin district hrang hrangah family pension late an endik mek zel a; Aizawlah pawh family pension late chu endik tura koh an ni a, Treasury office-a kal tur an intlar thui ṭhin hle.

Sorkar thuchhuah tarlan danin, Mizoram sorkar hnuaia pensioner-te leh family pensioner-te endikna hi Aizawlah chuan November 2, Thawhṭanni khan ṭan a ni a, Thawhṭannia endik leh nimin chhun dar 12 thlenga endik zat chu mi 2,500 vel an ni.

Treasury officer-te sawi danin, department hrang hranga pensioner-te chu an inlan hun tur ni siam a ni a, endik tura kalte chu token pek niin, tar chak lo deuh leh damlote endik hmasak an ni. Chhan eng emaw vanga Treasury office-a inlan thei lote chu an chenna inah endik tum a ni a; Jeevan Praman kaltlanga Digital Life Certificate neite tan a hmunah kal a ngai lo.

Accounts & Treasuries-a thawkte sawi danin, Central Treasury Rules-in a phût angin pension late chu kum tin November thlaah an awmna district-a Treasury office-ah inlan a, dan ang taka pension hamṭhatna la an nih leh nih loh endik ṭhin tur a ni. Mizoramah erawh chuan Mizoram Civil Pensioners Association nen insiamremin, verification hi veng tina an branch-te kutah dah a ni thung.