Mizo kutchhuak humhalh dan tur zirho

Mizoram Handloom and Handicrafts Deve-lopment Corporation Limited (ZOHANDCO) chuan nimin khan IPR Lianchhiari Rûnah Mizo kutchhuak chungchangah Intellectual Property Right chungchang zirhona an buatsaih a, Art & Culture minister C Lalsawivunga'n a hmanpui.

Art & Culture Minister chuan, hmasang aṭanga tun thlenga Mizo kutthemthiamte kutchhuak chu Mizo hnam nihna kengtu pakhat a nih avangin chawi sàn zel a pawimawh thu a sawi a, "Chawi lâr a pawimawh tluk zetin neitu nihna venhim a pawimawh. Mizo puan ṭhenkhatin Geographical Indication tag a nei tawh a, hmalak belh zel a ni bawk," a ti.

Mizo kutthemthiamte hmakhua sorkarin a ngaihtuah nasat thu leh chawi kâng tura a inhawn thu C Lalsawivunga chuan a sawi a; The Patents Act,1970 te, Copyright (Amendment) Act, 2012 te, The Trade Marks Act, 1999 leh The Designs Act, 2000 te pawh Mizo thilte venhimna atan hman ṭangkai dan tur zir chian ṭha a tih thu a sawi bawk.

Workshop on Intellectual Property Rights (Mizoram Craft Items) hawnnaah hian ZOHANDCO assistant manager Rodingluaia leh state award dawngtu Kaphnuni te pawhin thu an sawi.

Zirhonaah Dr Malsawmtluangi, Hnam Chhantu Pawl-in ‘Traditional Design & Modern Interpretation on Mizo Craft Items' tih thupui a sawi a; mithiamte'n an sawiho zui. Mizo kutchhuak eng emaw zat pho chhuah a ni bawk.