Naubân lâk leh zawrh khap thu puang

Kolasib divisional forest officer PC Lalṭanpuia chuan thupek tichhuakin, Kolasib Forest Division huam chhungah phalna nei loa naubân lâk, zawrh leh hralh khap a nih thu a puang.

PC Lalṭanpuia chuan, tunlaiin 'Nauban hi cancer damdawi a ni' tih thu dik lo thehdarh a nih thu tarlangin, "Mi ṭhenkhatin ramhnuaiah phalna nei loin naubân an la khawm a, zuar chhawng pawh an awm nual a ni. Kum 2024 khan Civil Hospital, Aizawla medicine specialist pawhin naubân hi cancer damdawi a nih loh thu chiang takin a lo sawifiah tawh. Mizoram (Forest) Act 1955 Section 5(1) leh 24(4) tlawhchhanin phalna nei loa naubân la, zuar leh hralhte chu dan anga hrem turin Court-ah thawn zel an ni ang," a ti.

Ramsa pêl, sava veh leh luia nungchate man leh tihhlum ching an awm tih tarlangin Kolasib DFO chuan, "Ramsa leh sava veh, tihhlum, khawi leh a nung emaw, a sa leh a taksa peng eng pawh zawrh hi Wildlife (Protection) Act, 1972 hmangin khap tlat a ni," a ti a; dan bawhchhetute chu kum 7 thleng tàn emaw, Rs 1,00,000 aia tlem lo chawitir emaw, a pahnih emawa hrem theih an nih thu leh, luia nungchate dan loa tihlumte chu Fisheries Act hmanga hrem theih a ni thu a tarlang.

Kolasib DFO chuan, dan bawhchhiatna kaihhnawih video social media-a tarlang ṭhinte fimkhur turin a chah a, an video pho chhuahte chu finfiahna (evidence) a nih avangin hetiang video tarlangtute chungah na taka dan lekkawh nghal theih a nih thute a tarlang bawk.