Ramri khuaahte police dah leh a ni - IGP

Inspector general of police (IGP) H Ramthlengliana chuan, Mizoram khawchhak lama police awm lohna khua 12-ah ruihhlo tawlhrûk veng turin police an dah leh thu a sawi.

Operation Trident hlawhtling taka kalpui a nih avanga MZP-in nimina Home department chawimawina hun Home Minister pisaa an buatsaihah IGP chuan, "Ruihhlo tawlhrûk veng turin khawchhak lam khaw 12, police awm lohna hmunah police 24 dah leh a ni a, khaw pakhatah pahnih zel kan dah. Nikum lama kan dahna khaw ṭhenkhatah chuan dah ngai tawh loah kan ngai. Manipur aṭanga ruihhlo rawn lut tur veng turin New Vervek leh Zohmunah police kan dah belh bawk," a ti.

H Ramthlengliana chuan, an hmabak a ko thu sawiin, "Ruihhlo kalkawng pawimawh tak kan ni. Operation Jericho kan kalpui aṭangin ruihhlo a tawmim nasa a, 70%-80% chu kan dangchat theiin kan hria. Hlet dang a chhuah zel a, Manipur lam aṭangin a rawn lut nasa a, theihtawp chhuahin kan veng," a ti a; ṭhál a nih hunah ruihhlo tawlh rutute tan kal khàn hmun hrang hrangah a tam leh dawn thu a sawi.

Mizoram IGP chuan, Mizoram Police-in ruihhlo an manin, a kengtute an man mâwl tawp tawh ngai lo tih sawiin, "A rawn kalna leh kal zelna chhui zui ṭhin a ni," a ti a, chumi kal zelah chuan Operation Trident a rawn chhuah tâk thu a sawi bawk.