Youth Entrepreneurs Summit neih a ni

Mizoram Entrepreneurs' Chamber chuan nimin khan Woodland Hill, Aizawlah Youth Entrepreneurs Summit (YES) 2026 an buatsaih a, chief minister Lalduhoma'n a hmanpui. Zirlaite tan Innovation Challenge buatsaih a ni.

YES 2026 hun khatnaah zirna-in (higher institution)-a zirlaite Innovation Challenge-ah an inel a; moderator Alan Lalhriatpuia kaihhruaina hnuaiah judge pathumte'n an endik.

Innovation Challenge-ah hian Aizawl College zirlai pathum - Kenedy Malsawmtluanga, Mangchhuanthanga leh K Lalrotluanga te chu 'Page Turners, waste paper recycling into functional products' tih hmangin pakhatna an ni a; Prateek Raj, NIT Mizoram pahnihna niin, Deborah R Lalhmingmawii, Lalhlimpuii Chongthu leh Malsawmzuala, Pachhunga University College-te chu pathumna an ni.

YES 2026 hun hnihna chu chief minister Lalduhoma'n hmanpuiin, Mizo entrepreneur-te thil siam chhuah 10 a tlangzarh a, Summit puala Innovation Challenge an buatsaih lawmman a sem.

Summit hi Mizoram Entrepreneurs' Chamber vice president C Lalpekliana'n a kaihruai a, president Joseph L Ralte-in thu a sawi. Handholding chief executive officer Lalfakzuala'n Bána Kaih scheme kalpui dan a sawi a; Mizorama entreprenuer hmasa ber nia hriat Dohnuna hlawhtlin dan sawi a ni bawk.