Renewable Energy Summit & Expo-ah PE Minister-in Mizoram mamawhte thlen

Power & Electricity minister F Rodingliana chu November 2, Thawhṭanni khan Ministry of New & Renewable Energy (MNRE) leh International Solar Alliance (ISA) ten Delhi-a 'Bharat Renewable Energy Summit & Expo 2026' an buatsaihah a tel a, Mizoram mamawhte a thlen.

Summit hi prime minister Narendra Modi-a'n a hawn zawhah Union New and Renewable Energy minister Pralhad Joshi kaihhruaiin state chief minister leh Power & Electricity minister-te pualin Round Table Plenary Session buatsaih a ni a; he hunah hian F Rodingliana chuan Mizorama kawlphetha lam tihchangtluna tura mamawhte a thlen a ni.

Mizoram Power Minister chuan, renewable energy sector-ah kawlphetha tam tak siam chhuak turin Mizoramin theihna (potential) a ngah thu sawiin, chuta tan chuan MNRE puihna mamawh a nih dan a tarlang a; MNRE-in kumin kum tira scheme thar 'Small Hydro Power Development Scheme' a tihchhuah hmanga puih dan dap turin a ngen.

PM Suryaghar: Rooftop Solar Scheme kalpuinaah Mizoram chu a ti ṭha pawl a nih thu sawiin F Rodingliana chuan, "Central subsidy bakah state subsidy pe tel state tlemte zinga kan ni," a ti a; nizung chakna (solar) hmanga kawlphetha siam chhuah tipung tura Mizoram sorkarin hma a lak dante a sawifiah.

F Rodingliana hian nimin chawhnu khan Delhi Mizoram House-ah New Development Bank (BRICS Bank) aiawhte hmuin, Tuivai Hydro Power Project siamna atana sum hmuh dan tur a sawipui a; NDB aiawhte chuan, funding an pek theih tur thu sawiin, Department of Economic Affairs kaltlanga tih a ngaih thu Minister an hrilh. DEA nen indawr hnuah la inbiak leh turin thu an dah a ni.

Mizoram PE Minister hi PE secretary Dr H Lianzela, chief engineer Laltlanthanga, Tuirini PMU project director C Lalsawmliana leh official dangte'n an ṭawiawm a ni.