Neihloh chhungkua 91-te Rs 9,00,000 pe tawh

Chief minister Lalduhoma hoin November 3, Thawhlehni khan CMO conference hall-ah Management Authority on Relocation of Neihloh Village an ṭhukhawm. Neihloh khaw thara cheng tur chhungkaw 91 hnenah in sakna tur Rs 9,00,000 ṭheuh pek a nih tawh thu tarlan a ni.

Ṭhutkhawma tarlan danin, khaw hmun a him loh avanga hmun him zawka sawn tur Neihloh khuaah hian chhungkaw 91 hnenah khaw hmun thara in sakna tur first instalment Rs 5,00,000 ṭheuh leh second instalment Rs 4,00,000 ṭheuh pek a ni tawh a; instalment hnuhnung ber thuneitute'n an buaipui leh mek.

Khaw thar atan hian khaw chhung kawng laih zawh thawkhat tawh a ni a, concrete pavement-a siam a ni ang. Pavement tih hmain tui pipe phûm ngaite phûm hmasak tur niin, pipe tam zawk phûm a ni tawh a; tui lakna tur aṭangin tui pump chhin theih thuai beisei a ni.

Zirtirtu quarters tur sak zawh tawh niin, sikul sakna tur sanction nghah mek a ni a, electric transformer bun a ni tawh. Health & Family Welfare department-in health clinic bunna tur sum an ruahman tawh a, anganwadi centre pawh an kutah dah a ni.

VC House sak tur chu Rural Development department ngaihtuah turin an dah a; Serchhip DC chu library, community hall leh retailer (fair price shop) ruahmanna siam tura tih a ni bawk.