Party 2-te'n tun thlengin ZPM kaihhruai sorkar an la pawm thei lo - Chhanzova

Aizawl East-II bialtu MLA B Lalchhanzova, minister of state chuan, sorkarna lo chelh tawh party pahnihte'n tun thlengin ZPM kaihhruai sorkar an la pawm theih loh thu leh, ZPM chuan ram hmangaihna dik hmanga ram rorel tura an intiamna chu an chhuan ber a nih thu a sawi.

B Lalchhanzova hian ZPM party-in nimina Sialsuka political training leh mi thar lawm luh inkhawm an buatsaihah thu sawiin, ZPM-in kum 2023 inthlan aṭangin ram rorelna kan chelh thu a sawi a, "Party lian pahnih inti ṭhin, sorkarna lo chelh tawhte chuan tun thlengin ZPM sorkar hi an la awih hleithei lo, an la pawm thei lo. Mahse, a thlen tlatna chhan chu ram rorelna ṭha zawk duh mipuite'n ram roreltute hi an thlak thei a ni tih entirtu a ni," a ti.

Ram hmangaihna dik hi a pawimawh thu sawiin B Lalchhanzova chuan, "Party dangte chuan an party upatna an chhuang ṭhin. Keini erawh chuan Zoram hmangaihna dik hmanga ram rorel tura kan intiamna hi kan chhuan ber a ni. Ram tana thil ṭha tih duhna, ram hmangaih tak takna hi ZPM pian chhan leh mi tam berte he party an awm duh chhan a ni," a ti a; ZPM sorkar chu mipui kutthlakna a nih thu a sawi.

Inkhawmah hian bialtu MLA Baryl Vanneihsangi pawhin thu a sawi a ni.