Assembly budget session ṭan a ni Hmasawnna atan member-ten taima taka ro an rel ka beisei - Governor
Nimin chawhma dar 10:30 aṭang khan Mizoram Legislative Assembly pariatna session vawi ngana, budget session ni bawk chu ṭan a ni a, Governor PS Sreedharan-a'n thu a sawi. Larsap chuan, House member-te chu Mizoram hmasawnna atan session-ah ṭha taka an tel a beisei thu a sawi. Session hi March 4, 2020 thleng awh tur a ni.
Governor chuan, a sorkar chu sorkar inrêlbàwlnaah rintlak, langtlang leh taima taka a kal thu sawiin, "Sorkar tum ber chu economic lama intodelh a ni a, chumi atan chuan agriculture leh infrastructure lama hmasawnna kalpui tum a ni. Industry lama hlâwkpui tham kalpui tum a ni a, a bikin mau leh thil dangte hman ṭangkai tum a ni. Ṭhalaite skill development, entrepreneurship leh sport hmanga tihhmasawn pawh kan ngaih pawimawh zingah a tel," a ti.
Tripura refugee camp-a Bru-te chungchangah sorkar laipui, Mizoram leh Tripura sorkarin inremna an ziak chu lawmawm a tih thu sawiin Larsap chuan, "Kum 22 chhung buaina awm tawh chinfel a ni hi a lawmawm tak zet," a ti a; Bru chungchanga buaina awm chinfel a nih theihna tura NGO, kohhran, mipui leh sorkar hmalaknaah a lawm thu a sawi.
Governor chuan, MNF sorkarin kum khat chhung office an luah tak thu sawiin, "Hemi chhung hian Mizoram hmasawnna atan kawng hrang hranga hmalak a ni. Kum liam taah khan economic lamah hmasawnna chhinchhiah tlak tak kan nei a, nikum chhunga kan economic growth rate chu 14.82% a ni a, hei hi India rama a sang berte zinga mi a ni," a ti.
PS Sreedharan chuan, sorkar flagship programme SEDP tihhlawhtlinna atan board 14 din a nih thu sawiin, "Board-ah hian minister, MLA, mithiam leh official-te an tel. Board-ah hian department 25 sem sawm a ni a, SEDP project a hlawhtlinna atan thuràwnte pein an vil dawn," a ti a; mipui tam zawkin an buaipui agriculture and a kaihhnawih thilte chu sorkarin a ngaih pawimawh a nih zel tur thu a sawi.
Loneitute harsatna sukiang turin sorkarin state leh district level-ah 'Coordination Committees for Doubling Farmers Income by 2020' a din thu sawiin Governor chuan, "Kan state hian horticulture lamah hmunhma ṭha tak, employment atan leh sum lak luhna atan kan nei. Dragon fruit leh madarin orange-te thawn chhuah tur hisâpin tam zawk chîn a ni a, a hlawhtlinna kan hmu mek. Thlai chîn pawh cluster mode-a kalpui a ni," a ti.
Larsap chuan, sorkarin autonomous district council area tel loin state hmasawn tluantling a ni thei lo tih a hriat thu sawiin, "Heng area-ahte hian hmasawnna lam hawi tam tak a awm. Zirna lama hmasawnnaah te, tui thianghlim in tur lamah te, electric lamahte hmalak a ni," a ti a; kawng thar siam leh solid waste management system tihchangtlunte chu hmachawp a nih thu a sawi.
Nimina session-ah hian Governor-in thu a sawi zawhah a thusawi chungchanga lawmthu sawina Motion of Thanks chu MNF member H Biakzauva'n a pu lut a, vawiinah Governor thusawi chu sawiho a ni ang.