Tuirini HEP atana sorkarin a rawihte Power Minister-in Delhi-ah a kâwm

Power & Electricity (PE) minister F Rodingliana chuan November 4, Nilaini khan Tuirini Hydel Project atana Mizoram sorkarin a rawihte chu Delhi Mizoram House-ah a kâwm a, hnathawh tawh chinte a thlirpui.

Mizoram sorkar hian Tuirini Hydro Power Project-ah hian management consultancy service atan STEAG Energy Services Ltd leh an thawhpui (joint venture partner) Convolution Engineering Consultancy LLP a ruai a ni.

Rodingliana hian hnathawh mekte thlirpuiin, Tuirini Project Monitoring Unit (PMU) puitu tur an nih avangin Tuirini khuah hna chu chak zawka a kal theih nan contract agreement anga hun tiam neia tih turte a hun taka zo zel turin a hrilh a, "Hun bituk chhunga hna zawh hman loh a awm chuan penal provision-te lekkawh zel a ni ang," a ti.

Consultant-te hi Tuirini Hydel Project siam chhunga technical thil zawng zawng te, environment leh social kaihhnawiha Tuirini PMU pui tur leh monitoring & supervision ti tura rawih an ni.

Nilaini vêk khan F Rodingliana hian tuikhuah leh civil infrastructure ngai loa lui tui luang lai chakna hmanga kawlphetha siam chhuahna Hydro Kinetic Turbine siam chhuaktu MACLEC company chu an hmunpuiah a tlawh. Minister hi MACLEC hotute'n lo dawngsawngin, technology an hmuh chhuah thar Hydro Kinetic Turbine chungchang an hrilhfiah bakah, factory an fanpui.

Tarlan danin, Hydro Kinetic Turbine hi siam hun chhung a rei lo a, senso a tlem avangin kawlphetha siam chhuahna man leh leina man a tlem. Lui pakhatah pawh hmun tam takah dah theih niin, lui tê deuhah pawh a ṭul dan azirin siam rem theih a ni a, tui khuah a ngaih loh avangin ram tihchhiat leh ram lak (land acquisition) a ngai lo a ni.

Hydro Kinetic Turbine hi hi Central Electricity Authority leh Ministry of New & Renewable Energy pawmpui tawh a nih avangin central scheme–Small Hydro Development Scheme aṭangin subsidy hmuh theih a ni a; hei vang hian minister Rodingliana hian Mizoramah enchhin tura hmalak a nih tur thu a sawi.