MSPMC-in EMRS sak mek an enfiah

Mizoram State Project Monitoring Committe (MSPMC) chuan an secretary Lalthanzuala Ralte hoin November 4, Nilaini khan Khawbunga Eklavya Model Residential School (EMRS) sak mek an endik a, nimin khan Khawzawla EMRS sak mek an endik leh bawk.

MSMPC hian EMRS sak mekte chu chipchar takin an fang a; a sak dan kalhmang, hmanraw hman, rawra, balu leh cement an hmante a ṭhat leh ṭhat loh te, sorkar inkaihhruaina dan leh quality control standard siamte zawm a nih leh nih loh an endik a ni.

Hna thawktu contractor-te chu neitu thinlung pûa hna ṭha taka thawk tur leh, inkaihhruaina dante ṭha taka zui turin an chah a; hna an thawh zelnaah harsatna an neih chuan a ṭul anga chinfelpui an inhuam thu an an hrilh.

EMRS-te chu a hun taka sak zawh a nih theih nan ruahmanna mumal tak siam a pawimawh thu sawi an sawi a; hna thawktute'n an mamawh ang zat hmanrua an mamawh hun taka an neih reng theih nan hma la turin contractor-te chah. Chhiatna thleng theite dâwl zo in him sak a pawimawh thu an sawi bawk.

EMRS, Khawbung hi Mizoram EMRS Society enkawlna hnuaiah ram pum huap guidelines leh CBSE curriculum dung zuia kalpui tur a ni a, pawl VII-XII thleng zirlai mipa leh hmeichhia mi 240 ve ve leng tura ruahman a ni.

EMRS, Khawzawl chu Ministry of Tribal Affairs (MoTA) aṭanga hmuh cheng vbc 47.05 hmanga sak a ni a, contractor chu Zothan Creation, Aizawl a ni. October 13, 2025 khan hna thawh ṭan a ni a, October 13, 2027-a sak zawh tura tih a ni.

Tribal naupangte'n zirna ṭha an neih theihna tura duan EMRS-ah hian zirlaite mamawh - hostel, uniform, lehkhabu leh stationery-te zawng zawng sorkarin a tumsak vek a; campus chhungah mipa leh hmeichhe hostel hrang, laboratory, infiamna chi hrang hrang, rimawi zirnate awm tura duan a ni. Zirtirtute leh thawktu dang te, damdawi lama enkawltu tur nurse-te thleng a hmunah an awm chilh dawn a ni.