HIV/AIDS donaa hmalak dan thlirho

Lunglei District AIDS Prevention & Control Committee chuan nimin khan Mission AIDS Suraksha (MAS) kalpui meka Lunglei district dinhmun leh Intensified IEC Campaign 3.0 hnuaia HIV/AIDS chungchang inzirtirna beihpui thlak kalpui dan an thlirho. Hnahthial District AIDS Prevention & Control Committee pawhin hmalak dante an thlir let.

Lunglei DAPCC hi SDO (Sadar) Buddhi Akhil kaihhruaiin DC conference hall-ah an ṭhukhawm a; MAS target (95:95:95) hnuaiah Lunglei district chuan 89:93:96 a neih tawh thu tarlan a ni.

MAS target tihlawhtling turin sorkar pisa, zirna-in leh khualzin phur lirthei khalhtute zingah HIV/AIDS chungchang inzirtirna leh endikna neih an rel a; Healthy Lunglei District Campaign hnuaia hmalaknaah HIV endik tel te, chak zawka tlawmngai pawl leh kohhrante nena thawhho dan turte an rel bawk.

Lunglei district-ah hian September-October 2026 chhung khan khaw 25-ah HIV/AIDS leh mipat hmeichhiatna aṭanga natna inkai chhâwn theih, saihri (syphilis) chungchang inzirtirna leh thisen endik rûnpui neih a ni a; mipui vantlang zingah leh zirna-inahte inzirtirna an neih bakah, in tin tlawh chhuakin inzirtirna thuziak sem a ni. Inzirtirna hrang hrangah mi 1,114 telin, mi 410-te thisen endik a ni.

Hnahthial DAPCC chu an chairman K Vanlalruati, district bawrhsap kaihhruaiin an ṭhu a; MAS leh Intensified IEC Campaign 2026 chungchanga hmalak dante thlirho a ni. HIV/AIDS donaa hma la ṭha, Surakshit District-a puan an nih chungchangah an lawm thu leh, Surakshit Plus District ni tura ṭan lak a nih thu an sawi.