HM-in hâlpuah khapna dan a sawifiah: 'Dân thlâwp turin mipui kan ngen' - HM

Home minister K Sapdanga chuan nimin khan Aizawl Press Club-ah thuthar thehdarhtute a kâwm a; sorkarin halpuah leh halmawi khapna dan a siam thar, The Mizoram Regulation of Fireworks Act, 2026 siam chhan sawifiahin, dan thláwp turin Mizoram mipui a ngen.

K Sapdanga chuan, halpuahte leh halmawite chu mihring hriselna leh environment tana thil ṭha lo thlentu,m bengchheng (noise pollution) siamtu a nih thu a sawi a, "Mipui vantlang hriselna leh environment venhimna ngaihtuahna aṭangin halpuah leh halmawi te hi uluk taka khuahkhirh a ṭul," a ti.

Home Minister chuan, sorkar leh tlawmngai pawlte bakah, mimal ṭhahnemngaite'n halpuah leh halmawi hman ṭha an ti lo tih sawiin, "Mizoram sorkar pawhin kum 2008 vel aṭang khan a bikin Krismas leh kumthar laiin a lo khap tawh ṭhin," a ti a; sorkar leh khawtlang hruaitute nena inlungrual takin khapna kalpui ṭhin a nih thu a sawi.

Tun hmain halpuah leh halmawi khapna dan mumal tak Mizoramin a neih loh avangin Criminal Procedure Code (CrPC) hnuaiah khapna thupek chhuah ṭhin a nih thu sawiin Minister chuan, "Kum 2024 aṭanga criminal law thar hman hnuah chuan Bharatiya Nagarik Suraksha Sanhita (BNSS) hnuaiah khapna kalpui ṭhin a ni," a ti.

K Sapdanga chuan, CrPC leh BNSS hmanga halpuah leh halmawi khapna kenkawh leh dan bawhchhiate hremnaah duhkhawp lohna nasa tak a awm ṭhin tih sawiin, "Chak taka kenkawh kawngah remchan tâwk lohna a awm ṭhin," a ti a; sorkar leh tlawmngai pawlte'n halpuah khapna an thlir let changin dan awmze nei zawk neih ṭulah an ngaih thu a sawi.

Home Minister sawi danin, dan awmze neih zawk neih rawtna zir chiang tur leh a ṭul anga hma la a, dan siam thar tura rawtna siamtu tur Working Committee on Prohibition of Fire Crackers din a ni a, Home department kaihhruaina hnuaiah vawi eng emaw zat an ṭhukhawm.

Dan awm sate hman remchang tâwk loa hriat a nih avangin The Mizoram Regulation of Fireworks Bill, 2026 duan a ni a, Bill chu August 25, 2026 khan Assembly House-ah pawm niin, The Mizoram Regulation of Fireworks Act, 2026 (MRFA) siam a ni. Act thar chu Governor-in a pawmpui hnuah September 22, 2026 khan Mizoram gazette-ah chhuah a ni.

MRFA 2026 hnuaiah hian halpuah leh a kaihhnawih dangte mumal taka khap a ni a; dan bawhchhiatte hremnate pawh chiang taka tarlan a ni. Kumin Krismas leh kum thar lo thleng tur hi dan thar siam hnua hunpui hman hmasa ber a ni dawn.

Home Minister chuan, Krismas leh kumthar hlim leh thlamuang taka mi tinin an hman theih nan sorkar leh tlawmngai pawlte'n mumal taka dan kengkawh turin ruahmanna an siam thu a sawi a; halpuah khapna dan kenkawh kawngah sorkar leh tlawmngai pawlte hmalakna ṭha taka thlâwp turin Mizoram mipui a ngen a ni.

Press conference-ah hian Home Minister hi IPR minister B Lalchhanzova, Home secre-tary Vanlalmawia, IGP H Ramthleng-liana, IPR director Mina Zoliani Joute leh Central YMA finance secretary MS Ralte ten an ṭawiawm.