Leitlangpui Run 2026 buatsaih a ni: Ruihhlo zuarte hrem lohin an chhuak tur a ni lo - CM Duhoma

Nimin zing khan Lungleiah 1st Leitlangpui Run 2026 buatsaih a ni. Run kharna inkhawmah chief minister Lalduhoma chuan, ruihhlo vangin ṭhalai tam tak an thih tawh thu leh chhawr tlak loh ngawlvei tam tak an awm thu sawiin, Mizoram ṭhalaite chu ruihhlo ti chhin lo tura chahin, "Ruihhlo zuarte chu hrem lohin an chhuak tur a ni lo," a ti.

Chief Minister chuan, "Ruihhlo vangin ṭhalai tam tak kan vui liam tawh a, chhawr tlak loh ngawlvei tam tak kan nei reng bawk a, chhungkaw tam tak a tichhe tawh. Ruihhlo laka himna ṭha ber chu tihchhin loh a ni. Ruihhlo zuarte hrem lohin an chhuak tur a ni lo a, a zuar rute chu thuneitute hnenah thlen zel tur a ni," a ti a; ruihhlo hnâwl turin Lunglei mipuit a chah.

Leitlangpui Run thupui, 'Clean, green, healthy and drug-free Lunglei' tih chu Lunglei khawpui leh Mizoram pumin an mamawh thupui a nih thu sawiin Lalduh-oma chuan, "Hriselna hi ram hmasawnna tehna (economic development indica-tor) pawimawh ber zinga mi a ni," a ti.

Lalduhoma chuan, infiamnaa theihna nei ṭhalaite tan sorkarin Bána Kaih Empowering Mizoram Sports a kalpui mek tih sawiin, "Olympics 2036 thlirin hna kan thawk a, Mizoram ṭhalai talent nei ṭha tam tak an la awm ang a, chu'ng mite tan chuan sorkarin theihtawp a chhuah zel dawn," a ti a; Mizoram chhim lama running event lian ber leh hmasa ber hlawhtling taka buatsaihtu Lunglei bawrhsap Navneet Mann leh a thawhpuite chungah a lawm thu a sawi.

Chief Minister chuan, Leitlangpui Run-a tel zinga mi R Lalruatmawia (40), Lunglei Chanmari a thi chu pawi a tih thu sawiin, a chhungte, khawtlang mipui, Lunglei mipui leh intlansiak huaihawttute a tawrhpui thu a sawi.

CM Lalduhoma hian Leitlangpui Run-a ti ṭhate hnenah lawmman a sem a; NCORD hnuaia Lunglei district-a ruihhlo donaa hmalak dan tur ruahmanna '3-Year Annual Action Plan' a tlangzarh bawk.

Leitlangpui Run kharnaah hian Lunglei High Powered Committee vice chairman V Malsawmtluanga, MLA, Lunglei South bialtu MLA Lalramliana Papuia, Lunglei Municipal Council chairman Lalzuithanga leh councillor te, DC leh sorkar official te, tlawmngai pawl leh kohhran aiawh te, intlansiaka telte leh mipui ṭhahnem tak an tel a ni.