MPF-in Annual General Meeting hmang

Mizoram People Forum (MPF) chuan nimin khan Mission Veng Kohhran Hall-ah an pawl inkhawmpui lian, Annual General Meeting vawi 19-na an hmang a; 'MPF hmasawnna turte' tih thupui hmangin hmalak zel dan turte sawiho a nih bakah, 'Ram leh hnam siamṭhat nan rilru put hmang dik' tih thupui zirho a ni.

MPF General Meeting hun hmasa chu MPF president Rev. John Raldosanga'n a kaihruai a; general secretary Rev. Lalramliana Pachuau-in kum khat chhunga MPF hmalakna chanchin sawiin, MPF-a la tel lo kohhrante tel tura sàwm an nih thu te, State Election Commission nena thawhhona te, local forum din belh a nih thu te, Mizoram State Project Monitoring Committee-a tel thute a sawi.

MPF vice president R Lalngheta'n thu a sawi bakah, 'MPF hmasawnna turte' tih thupui hmangin hmalak zel dan turte sawiho a ni a; kum 2027-28 budget atan Rs 16,43,000 pawm a ni bawk.

Chawhnu lamah vice president Rev. V Suikharliana'n kaihruaiin thupui zirho a ni a; Dr H Laldinmawia'n 'Ram leh hnam siamṭhat nan rilru put hmang dik' tih thupui sawiin, sawiho a ni.