Minister-in ngawrh lehzualin Mizoramah tuialhthei zawn hna thawk turin a ngen

Ministry of Mining chuan November 5, Ningani leh nimin khan Taj Exotica & Resot, Goa-ah '4th Conference of Mining Ministers' an buatsaih a; Mizoram aṭanga tel Geology & Mining minister F Rodingliana chuan, Mizoramah ngawrh lehzuala tuialhthei zawn hna thawk turin sorkar laipuia thuneitute a ngen.

F Rodingliana chuan, Mizoram hmun ṭhenkhatah lei hriak (oil & gas) zawn ni tawh mah se, hlâwk tham hmuh a la nih loh thu sawiin, "Mizoram ṭhenawma awm Myanmar leh Tripura-ah te leilung hausakna tam tak hai chhuah a ni lawi si," a ti a; Mizoramah pawh ngawrh zawka zawn hna thawk tur leh Thiltlanga gas pût zir chiang tur mithiam tir turin thuneitute a ngen a ni.

Làmzáwl Coal Exploration block tender chhuah thuai a nih theih nan CMPDIL, Ministry of Mines chu tender document final thuai tura ngenin F Rodingliana chuan, India hmarchhak state-a mining engineer-te tan Annual Training Module mumal tak siam turin Ministry of Mines a ngen bawk.

Geology & Mining Minister chuan, SASCI hmu tura Ministry of Mines Healthy Competition 2026-27 a buatsaiha Mining Reform Parameters an siamah minor mineral lam hawi (minor mineral centric) dah tel turin a ngen a; kum 2025-26 chhunga SASCI Competion - Mining Sector Refirms (minor mineral component)-ah Mizoramin cheng vbc 100 a hmuh avangin lawmawm a tih thu a sawi.

Conference of Mining Ministers-ah hian thupui chu 'Reforms in Mines and Coal Sector' tih a ni a, Union Coal and Mines minister G Kishan Reddy leh minister of state Satish Chandra Dubey ten an hmanpui a; India rama mining leh coal sector-a hmasawnna turte sawiho a ni.